اتعلمت_من_قصة_سيدنا_سليمان١٥الاخيره#الليله٤٦٠

#اتعلمت_من_قصة_سيدنا_سليمان١٥الاخيره

#الليله٤٦٠

كانت نهاية رحبعام معروفة من البداية بعد العك اللى عمال يعكه والغرور اللى راكبه ولكن مع ذلك ربنا اداله أكثر من فرصة

طبعا رجع رحبعام جرى على بيت المقدس بسبطينه بنيامين ويهوذا في جنوب فلسطين

و القبائل العشرة التانين بايعوا يربعام

ملك عليهم 

وكانت مملكتهم اكبر مساحة و عدد

يربعام مكدبش خبر قالهم تعالوا يا ولاد هو انتم يعنى لازم تروحوا القدس وتصلوا ف المعبد دا مينفعش دول بقوا دولة الاعداء 

طب ما تيجوا نتعبد هنا ف بلدنا بدل الشحططه والمرمطه والفرهده 

ازاى يا عم يربحام 

قالهم تعالوا اعملكم عجلين حلوين كده من الذهب زى اللى عملوهم اجدادنا زمان اول ما هربوا من مصر 

قالوا له ياسلام والله فكره جميله 

طب ما تيجى نزود اللهه تانيه كدا 

ايه رأيكم فى عشتار و كموت وملكوم دولم بتوع الجيران ع الاقل لا هيلزمونا بعباده ولا هيتهمونا باننا عملنا خطايا زى الوصايا بتوع ياهوه (ياهوه يعنى ربنا ) 

طب رحبعام يسكت 

ابدا 

دا جهز جيش وكان هيروح يحاربهم 

 بس بيقولوا ان فى نبى ف الزمن ده قاله اهدى ... فهدى 

وقاله اسكت .... فسكت 

اه واللهِ بس كده 

ربنا أعانه ف اول ٣ سنين من حكمه فبنى مدناً وحصنها وجاله كثير من الكهنة الناس العاديه اللى هربوا من يربعام وكفره 

اما يربعام عين كهنة للعجلين الدهب بتوعه وعمل عيد زى اللى عند بتوع القدس(اورشليم) اللي في يهوذا بقى يطلع ع المذبح و يذبح للعجلين الذبايح والقرابين 

كافر ... كافر يعنى 

كُفر على ابوه 

الاهبل رحبعام ابن النبى وحفيد النبى خد له ٣ سنين 

ولقى ان الناس تمام مع عبادة الالهه فى مملكة الشمال فاعتمدهم هو كمان معبودات من دون الله ف مملكة الجنوب 

مش قلنا اهبل 

وفضلوا كده لحد ما احتلوهم من الجنوب الغربى من ناحية مصر ومن الشرق من ملوك العراق 

وجايين دلوقتى يتكلموا عن ابناء الله وانهم شعب الله المختار 

وهم اساسا جدودهم كفروا 

تخيلوا ان الحكايات دى موجوده عندهم وغيرها من الكلام القذر اللى بيوصموا به انبياء الله 

عموما 

الحدوته التاريخه خلصت عند كده 

كان ممكن اكتفى بموت سيدنا سليمان كنهايه للحدوته 

بس حبيت اوريكم لما يكون الابن ضال ممكن يعمل ايه ف ملك ابوه حتى لو كان ابوه نبى 

وهو ميفرقش كتير عن ابن سيدنا نوح ولا زوجة سيدنا لوط ولا ابو سيدنا ابراهيم وغيرهم

 (يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلادِكُمْ عَدُوّاً لَكُمْ فَاحْذَرُوهُمْ وَإِنْ تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَحِيمٌ * إِنَّمَا أَمْوَالُكُمْ وَأَوْلادُكُمْ فِتْنَةٌ وَاللَّهُ عِنْدَهُ أَجْرٌ عَظِيمٌ) [التغابن:15]

#ابتسام

لاننا ف رمضان حبيت اخلى فى حاجه مختلف وبما انى بقالى قرب السنتين بكتب قصص كل ليله قصة جديده... 

فقررت ان القصص تكون كلها قصص دينيه وهبتدى بقصة سيدنا سليمان واتمنى انها تعجبكم

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٤٦٠

#ابتسام