#ملوك_الجدعنه_ج٨#الليله٣٢٢

#ملوك_الجدعنه_ج٨

#الليله٣٢٢

بالمناسبه انا رجعت اتكلمت عن سخمت والعائله الكريمه فى قصة ايزيس واوزوريس ودى بردو قصة متعوب فيها علشان اجمع كل الداتا بتاعتها هنزل روابطها ف الكومنتات تحت👇

زى ما متعوده انى اعيد حكايه عدى عليها سنه و من بعد رمضان والعيد كملت اعيد حودايتى اليوميه والحكايه دى لها غلاوه عندى لانها كانت كلها بحث استقصائى عن اهم الحفاير والكنوز المكتشفه... المفارقه انى كنت اختارت الاسم قبل رمضان اللى فات وقبل ما يتعمل المسلسل اللى بيحمل نفس الاسم وكانت صدفه غير مقصوده ولكن لو عاوز رأيى ف اللى اتكلمت عنهم هم ملوك الجدعنه بجد

#ملوك_الجدعنه_ج٨

#الليله٣٢٢

امنا الغوله دى الالهه سخمت وزى ما قلنا الهة الاذيه والضرر عند قدماء المصريين 

ومتفهمش بقى ليه قالوا عليها غوله يمكن حاجه محفوظه ف ذاكرة الوعى الجمعى لاهل البلاد

ولا القدماء لما عملوها ادوها الشكل المخيف ده

وقبل ما نعرف لاجران حلها ازاى نقول ان الاسطوره الفرعونيه بتقول 

ان رع إله الشمس غضب على البشر لاستهزائهم به ومدولوش قدره

ومكانته المفروضه فقام باعت بنته سخمت الجانب الشرير من ولاده 

علشان تنتقم

و تقتل هؤلاء البشر النمارده اللى مبيطمرش فيهم 

بس واضح ان سخمت اتبسط من موضوع القتل وعملت زى عفت الشربينى وقالت اصلى حبيتش الموضوع اوى 

و استمتعت بالشغلانه جداً و فضلت تقتل ف الناس احد ما قربت تخلص على البشر تقريباً

رع يتحايل عليها يا بنتى اهدى يا ضنايا كفايه سيبيلنا شوية شعب نحكمهم ونطلع فيهم عُقدنا 

وهى ابدا زى ما قلنا حبيتش الشغلانه اوى ... و من هنا لهنا قرر رع انه يخدع سخمت بأن قدم لها كميات كبيرة من الجعة (البيره) الملونة أحمر والتي تشبه لون الدم فشربت منه على انه دم وهى بتموت ف شرب الدم بس لما شربت الجعة البيره يعنى وسكرت وهديت لحد ما توقفت عن القتل 

ومع انها كده تبعاً للاسطوره شريره وعدوة البشر

عكس اختها الطيوبه حتحور اللى بيرمز لها بسيده لابسه احمر وعلى رأسها قرنى بقرة بينهم قرص الشمس 

وهى الهة الخير والسماء و الحب و الجمال و الأمومة و التعدين و الموسيقي والرزق  

يعنى عكس سخمت 

بس صراحه سخمت مع كل ده بس كانت بتبقى جدعة مع الملوك المصريين لما بيحاربوا وبتقف معاهم ضد اعدائهم وكانوا بيقولوا عليها حامية الملوك 

ودا عملاً بمبدأ انا وابن عمى ع الغريب 

ومن المعروف يعنى ان الهواء الساخن اللى بيهب دا انفاس سخمت 

مش رياح الخماسين الفصليه المحليه 

و مش بسبب منخفضات جوية تندفع من ناحية الشرق عبر الشواطئ الجنوبية من البحر المتوسط

توء توء 

هى انفاس سخمت 

نرجع بقى لمشكلة لاجران والعمال اللى مش عاوزين يشتغلوا دول نعمل ايه ؟؟؟

زى ما قلنا ان لاجران غُلب يقنعهم ان مفيش غوله ولا كلام من ده بس مفيش فايده 

طب يعمل ايه؟؟؟

اخيرا خطرت ف باله فكره 

قالهم هى فعلاً الغوله 

وهى اللى اكلت العيال بس الحمد لله انا عملت عليها تعويذه فرعونيه كتفتها ومنعت شرها 

وبدأ الناس ترجع حبه حبه على حذر الى ان اطمأنوا ان الدنيا تمام وانه فعلا كفاهم شر سخمت 

و ياترى الشتايم اللى احيانا بنقولها

يا سخام وسخماط ومسخمط 

هل دى لها علاقه ب سخمت مش عارفه وان كنت اشك 

المهم الراجل القرده لاجراند اقنع العمال وحبه حبه رجع التنقيب زى الاول بنفس الحماسه ونفس غزارة التماثيل المستخرجه 

بس فى ظاهره غريبه ظهرت ف الوقت ده 

الناس فكروا كده وشغلوا مخهم 

ويا ويلك من الجاهل بالدين لما يشغل مخه 

قالوا ايه بقى ؟؟؟؟

= هى مش سخمت دى ممكن تاخد العيال وتخفيهم ؟؟؟

-اه

=طب ما كده ممكن تحقق حلم الانجاب للنساء اللتى لا تنجب

تصدق اه 

ومتفهمش هتعمل كده من انهى جيهه 

بس فجأه الغوله اصبحت صديقه النساء المحرومات من الانجاب زى ما ابو قردان صديق الفلاح كده

واللى مش بتخلف تروح تزور امنا الغوله الشهيره سخمت تطلب منها الشفاعه متفهمش تتشفع بمين و عند مين بردو ؟؟؟

ونفتكر مع بعض فكرة ذهاب النساء ف بعض الاماكن ف الصعيد للمعبد الفرعونى طلباً للخلفه 

واللى عملوها فى فيلم الطوق والاسوره ومع ان الفيلم مشى ف سكه تانيه استغفر الله العظيم غير سكة سخمت ... بس دا ما يعنيش ان اللى كانوا بيروحوا المعابد الفرعونيه كانوا استغفر الله العظيم بيسمعوا كلام الحزينه فردوس عبد الحميد (دا كان اسمها ف الفيلم )

وفضل لاجراند من ١٩٠٣ 

 ووصل عدد اللى جمعه من الخبيئه دى ل 800 تمثال ملكى و 8 آلاف تمثال صغير من البرونز

وفي يونيو عام ١٩٠٤ وأطلق على هذا العام "عام العجائب المدفونة"

وفضل شغال ف نفس المكان ف ١٩٠٥ و ١٩٠٦ 

و في سنة ١٩٠٧ امر لاجران بإغلاق الموقع بعد ما اصبح مجموع ما تم اكتشافه واستخراجه من الخبيئه حوالي ١٧٠٠٠ تمثالا او جزء من تمثال 

اه ... قرأت صح ١٧ الف تمثال او جزء من تمثال لحد ما قال رُوزقت كده واقفل يابنى على كده وبعدها رجع فناء الخبيئة بالكرنك شكله الأصلي كأرضية مسطحة

ولا كأن كان فى تحتها كنز الكنوز 

وبكده خلصت خبيئه البهو السابع على خير واتاخدت على المتحف المصرى ويقال انها اتستفت هناك على كده 

بعد ما كان لاجراند بيسجل كل قطعه لقاها ويصورها ويترجم اللى مكتوب عليها بالهيروغليفيه 

بس بيقولوا السجلات دى اتسرقت 

معرفش ليه ؟؟؟🤔

تعرف انت ؟؟؟🙄

عموما الكرنك لسه لم يفصح عن كل اسراره 

٤ - #خبيئة_الكرنك_٢

-------------------------

عارف لما تلاقى حاجه وتفكر انها تكون مهمه 

ساعتها هتجرى على الرؤساء بتوعك تقولهم على الحاجه المهمه دى 

بس مين هيسمع منك وانت حتة رئيس عمال نظافه مش دارس ولا اكاديمى زينا 

بس انت حاسس باهمية كشفك ده وعلشان كده متسكتش وتمشى ورا حلمك

واللى رفض الموظفين الصغيرين انهم يسمعوه سمعه رئيس البعثه الاثريه كلها

لو عاوز تعرف حصل ايه ؟؟

تعالوا قبل ما نسيب الكرنك كده نفضل فيه شويه اصل بعد فترة بسيطه خالص ف عمر الزمان قيمة ٨٠ سنه هيحصل اكتشاف تانى 

تعالوا نقفز بالتاريخ لسنه١٩٨٩ميلاديه

ونشوف خبيئه جديده و ف نفس المكان العجيب ده ... معبد الكرنك

كل سنه وانتم طيبين

ومن بكره مفيش حدوته قبل ما نصلى العشا والتراويح 

ربنا يجمعنا صحبه حول حوض نبيه و تحت ظل عرشه ويدخلنا جميعا من باب الريان 

#على_اسم_مصر_التاريخ_يقدر_يقول_ماشاء

#جدودك

#ابتسام