#ملوك_الجدعنه_ج٧#الليله٣٢١
بالمناسبه انا رجعت اتكلمت عن سخمت والعائله الكريمه فى قصة ايزيس واوزوريس ودى بردو قصة متعوب فيها علشان اجمع كل الداتا بتاعتها هنزل روابطها ف الكومنتات تحت👇
زى ما متعوده انى اعيد حكايه عدى عليها سنه و من بعد رمضان والعيد كملت اعيد حودايتى اليوميه والحكايه دى لها غلاوه عندى لانها كانت كلها بحث استقصائى عن اهم الحفاير والكنوز المكتشفه... المفارقه انى كنت اختارت الاسم قبل رمضان اللى فات وقبل ما يتعمل المسلسل اللى بيحمل نفس الاسم وكانت صدفه غير مقصوده ولكن لو عاوز رأيى ف اللى اتكلمت عنهم هم ملوك الجدعنه بجد
#ملوك_الجدعنه_ج٧
#الليله٣٢١
طيب مبدأيا كده فى ناس هتحبهم وانت بتتكلم عن جهودهم ف كشف الاثار واهتمامهم
اتكلمنا قبل كده عن ماسبيرو
وعن مارييت باشا اللى صراحه متكلمتش عنه بما يوفيه حقه .... و كمان لورييه بتاع الموميا المجهوله
وبطل الليله راجل عسليه ميقلش عنهم جدعنه ولولا يا قلب امه وفاته المبكره ف عز شبابه كان عمل حاجات كتيره اوى للاثار المصريه مين بقى جورج ليجران ده
٣- #خبيئة_الكرنك
----------------------
وليجران بطل جزء الليله من حدوتة الخبيئه
دا كان شاب فرنساوى عاشق للمصريات جه مصر وهو عنده ٢٧ سنه قرر انه يعيش يكمل الاكتشافات ف الاقصر و هو عنده ٣٠ سنه اصبح مدير حفريات الاقصر
و متحمس وعشمان ان يكون حظه ميقلش عن حظ اسلافه لوريل ولا ماسبيرو
صورته تحت 👇
وعاش ف الكرنك واصبح من مجاذيبه اللى مبيفارقوهوش (يالهوى كلمه طويله اوى)وبعد نصيحه من ماسبيرو رئيسه ف الوقت ده انه يعمل الحفائر بتاعته فى ساحة الصرح السابع
وطبعا تتخض لما تعرف ان مساحة البحث بتاعته امتدت ل لمساحه تصل إلى 2300 متر مربع يعنى مساحة ٢كم² و٣٠٠ متر
بس اما تعرف ان المساحه الكليه ٥٠٠٠٠٠متر
تعرف ان الاجداد دول اد ايه كانوا عظام
ويتضرب لهم الف تعظيم سلام
وهتلاقى تحت صوره من الطائره لمعبد الكرنك وهتشوف مساحه الصرح السابع بتاع لوجران ده صغنن اد ايه بالمقارنه بمساحة المعبد كله
الصرح السابع صورته تحت👇
ولوجران بيدير الموقع كله على اتساعه دا كله لوحده
ما قلنا ان هو رئيس منطقه اثار الاقصر ومش بس رئاسه لاء دا كمان ترجمه وتصوير لكل قطعه بيكتشفوها
وبيحكى ان المياه الجوفيه كانت بتعذبهم خصوصا لما وصلوا لاعماق كبيره جدا ١٥ و١٦ متر عمق
لدرجة انه مره قال لماسبيرو انه بيطلعوا من تحت الارض يدوخوا من كل العمق ده
بس زى ما قلنا المياه الجوفيه معذباهم فيجيبوا المضخات و الشادوف الاداه اللى كان اجدادنا بيستعملوها منذ الالاف السنين
وبيحكى لوجران عن فرحته لما ليجيبوا التمثال من تحت الارض
ويربطوه له ويطلع له
وبيحكى انه كان بيبقى زى الاب اللى بيجيله مولود جديد يشيلوه ويغسلوه من الطين اللى مغطيه وبعد ما يشيل الطين يلاقى الوجه الفرعونى اللى بيضحك له ويقلبه علشان يعرف اسمه ويسجله ويصوره
وف عز الفرحه الغامره دى
تحصل مصيبه ....
فجأه ٧ عيال يختفوا من على وش الارض وهم كانوا بيلعبوا قدامهم حالاً على الصخور المجاوره لمكان التنقيب
طبعا الدنيا اتقلبت فى الموقع والعيال يكونوا راحوا فين ؟؟؟
والسؤال بيقول يعنى انشقت الارض وبلعتهم
والعاقل هيقول اه هو كده الارض بلعتهم
وزى ما الارض بلعت المعزه رشيده بتاعة محمد عبد الرسول فى خبيئه الدير البحرى يبقى ده اللى حصل للولاد هنا
ويستمر البحث ايام
والامل يضعف انهم يلاقوا احياء فيهم
بس لما البحث يستمر اسابيع يبقى اكيد مفيش احياء بس على الاقل نلاقى جتتهم علشان يتدفنوا دفنه لائقه حسب شريعة دينهم ايا كان
وعلشان تبرد نار اهلهم
بس بعد اسابيع و ففتحه كده ف التل يظهر قدامهم شكل اسود مخيف لانثى نمر او اسد مش فارقه وشكلها مخيف لدرجة ان العمال الرجاله الصعايده الجامدين سابوا اللى ف ايدهم وجريوا على بعيد خالص عن مكان التنقيب
هم كده عرفوا ان دى الغوله اللى بلعت العيال ال٧
ويحايل فيهم لاجران انهم يرضوا يرجعوا ابداً
ويا روح ما بعدك روح ودى امنا الغوله لامؤخذه
مش مثلاً النداهه ولا السلعوه اللى ممكن نشويها وناكلها
طب علشان نعرف دا ايه ؟؟؟
الحكايه مبعدتش اوى
اللى لقوه دا كان تمثال للالاهه سخمت ودى كانت الهة عالم الحرب والشر والاذيه للعالم كله عامة ولمنف خاصة
فهى من الالهه القديمه الشريييره
اللى من ايام توحيد الشمال والجنوب وكانت هى وجوزها بتاح مكسرين الدنيا ف الدوله القديمه من الدول الفرعونيه ال٣ القديمه والوسطى والحديثه
المهم ان التنقيب وقف وعم لاجران هيتجنن يشجع العمال يرجعوا تانى
بس نرجع مين ياعم هو انت عبيط ؟؟؟
هل انت عبيت ؟؟؟
نرجع لامنا الغوله اللى بتخطف العيال وتاكلهم
والراجل هيتجنن
لحد ما هداه تفكيره لفكره اخر جنان وتمشى مع الدماغ اللى قدامه
يا ترى ايه الحل اللى هيعمله ليجران ؟؟؟🤔
وهل هينفع ولا لاء ؟؟؟🤫
ويا ترى له نتايج تانيه اغرب من الموضوع نفسه
الاوقات التاليه ؟؟؟🙄
اه فى ... 😳 طب ايه هى النتايج دى ؟؟
وممكن يكون تنقيب لاجران طلع كام اثر يعنى على دا كله
وهى اصلاً ايه حكاية سخمت دى ؟؟؟
دا اللى هنعرفه ف الليله الجايه
اه ابقوا اتفرجوا ع الصور تحت الموضوع لانها حلوه ومرتبطه بالموضوع وبتشرحه بطريقه اوضح
والله متعوب فيها
#على_اسم_مصر_التاريخ_يقدر_يقول_ماشاء
#جدودك
#ابتسام
تعليقات
إرسال تعليق