#سيدنا_موسى_بعد_العبور_الموسم_التانى_ج٣٤#الليله٧٢٦

#سيدنا_موسى_بعد_العبور_الموسم_التانى_ج٣٤

#الليله٧٢٦

اتعلمت من حكايه سيدنا موسى والخضر كذا حاجه 

اولًا : ان الخضر مش بيحضر لما باقول اسمه وبالتالي مش لازم اقول وعليكم السلام ورحمه الله وبركاته 

ثانيا : ان مش هو اللي نقل عاش بلقيس ووداه لسيدنا سليمان  

ثالثا : ودا الاهم اتعلمت ان اي حاجه مهما بانت شر في من وراءها خير ومصلحه حتى لو عشت ومت ما اعرفش نهايتها ولا ايه تفسيرها و ايه الخير اللى ممكن يجيلى منها 

نرجع لقصه سيدنا موسى و الخضر صحيح انتهت حكايته مع سيدنا موسى بس احنا لسه ما انتهت حكاياتنا مع سيدنا موسى الحكايه الليله لطيفه قوي هو انت ممكن تصدق ان الحجر يمشي ؟

لا مش يمشي يجري؟ الحجر فضل يجري وسيدنا موسى يجري وراه وبعدين وبعدين ضربه بالعصايه 

ياترى بقي ايه سر الحكايه الغريبه دي؟ هاقول لكم اولاد العم الغاليين ما عندهمش دم وما بيتكسفوش ولما يروحوا يستحموا الرجاله بينزلوا الميه سوا وسيدنا موسى بيتكسف وميحبش تبان عورته على حد علشان كده كان بيسيبهم يروحوا يستحموا ويروح هو في مكان كده لوحده متداري يستحمى فيه بس اولاد العم ما يسكتوش هو بيتدارى مننا ليه؟ 

اكيد في عله عيب في جسمه مرض و اي حاجه بيتكسف يستحمى قدام الرجاله علشان ما يشوفوهش و طبعا كان الكلام ده بيأذي سيدنا موسى

وكان سهل يعني انه يثبت لهم العكس بس برده ضد حياء وضد عبادتة عليه السلام علشان كده في يوم من الايام قلع سيدنا موسى لبسه ونزل الميه وراح جاي له حجر وجري وهو عليه هدوم سيدنا موسى سيدنا موسى يجري وراءه ومن كثر غيظه بقى بيخبطوا بالعصايه 

وكانك بتوصف صوره لواحد الكلب بتاعه 

 خطف هدومه منه و الكلب بيجري وهو بيجري وراء مش خجر

ولما وصل له سيدنا موسى و لما الحجر وقف  

كان واقف قدام بني العم ساعتها عارفوا ان موسى جسمه سليم البدن وعلشان كدا ما قدروش يغلطوا فيه ولا يعيبوا في شكله ولا جسمه 

طب انا جبت الكلام ده منين :

دا قول الله تعالى : يَا أَيُّهَا الَّذِينَ آمَنُوا لَا تَكُونُوا كَالَّذِينَ آذَوْا مُوسَى فَبَرَّأَهُ اللَّهُ مِمَّا قَالُوا وَكَانَ عِنْدَ اللَّهِ وَجِيهًا. {الأحزاب: 69}

طب ايش عرفنا انك بتحكى قصة الحجر

دا الحديث اللى بيوضح القصة اهه :

عَنِ النَّبِيِّ صلى الله عليه وسلم قَالَ:‏ كَانَتْ بَنُو اِسْرَائِيلَ يَغْتَسِلُونَ عُرَاةً، يَنْظُرُ بَعْضُهُمْ إلى بَعْضٍ، وَكَانَ مُوسَى يَغْتَسِلُ وَحْدَهُ، فَقَالُوا وَاللَّهِ مَا يَمْنَعُ مُوسَى أن يَغْتَسِلَ مَعَنَا إلا اَنَّهُ آدَرُ، فَذَهَبَ مَرَّةً يَغْتَسِلُ، فَوَضَعَ ثَوْبَهُ عَلَى حَجَرٍ، فَفَرَّ الْحَجَرُ بِثَوْبِهِ، فَخَرَجَ مُوسَى فِي اِثْرِهِ يَقُولُ ثَوْبِي يَا حَجَرُ‏.‏ حَتَّى نَظَرَتْ بَنُو اِسْرَائِيلَ إلى مُوسَى، فَقَالُوا وَاللَّهِ مَا بِمُوسَى مِنْ بَاْسٍ‏.‏ وَأخَذَ ثَوْبَهُ، فَطَفِقَ بِالْحَجَرِ ضَرْبًا ‏‏‏.‏ فَقَالَ أبو هُرَيْرَةَ وَاللَّهِ اِنَّهُ لَنَدَبٌ بِالْحَجَرِ سِتَّةٌ أو سَبْعَةٌ ضَرْبًا بِالْحَجَرِ‏

قربنا نخلص قصه سيدنا موسى مش فاضل كتير

فاضل ايه؟

دا اللى هنحكيه الليله الجايه اذا احيانا ربنا 

بس ع العموم متنسوش لو حابين تقرأوا حاجه تانى من عندى 

اكتبوا الهاشتاج #الليله 

وجنبه اى رقم اقل من٧٢٦

هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

ولو مش بتشوف حواديتى اليوميه بانتظام يبقى ممكن تعمل متابعه وسى فيرست 

ولو عجبك اعملوا لايك وكومنت وشجعونى 

#يارب_اكون_فهمتها_صح

#فوتكم_بعافيه_وعفو_ومعافاه

#ابتسام