#داين_تدان #الليله٣٦٠#قانون_الكرما

#داين_تدان 
#الليله٣٦٠
#قانون_الكرما

داين تدان 
جمله صغيره بس عميقه عمق الازل

بتشوفها وتسمعها طول الوقت بس بتحسها لما تكبر حبة وتأخذ وتدى مع الدنيا عمر 
ساعتها هتستشعرها وتشوفها بعنيك 

فى احد السلف مره قال اخاف ان اعير امرأه حبلى بحبلها فيصيبنى ما اصابها 
يا ربى مع كل ما ف المقوله من طرافه لاستحالة تحققها 

بس لسه الفرضيه ممكنه مع ارادة الله عز وجل 

خفت لما بشوفها كل يوم والتانى بتتحقق مع استحالت تحققها 

يعنى زوجة الابن اللى عذبت حماتها واستقوت عليها وفضلت لحد ما فرقتها عن ابنها 

علشان يلف الزمن و زوجات ابنائها يعملوا معاها ما فعلته ف حماتها واكتر 

افتكرت الموضوع دلوقتى لما خدت بالى من حاجه يمكن مرت قبل كده مرور الكرام لحد ما جمعتها دلوقتى بس 

كان فى جاره دايماً تستغل انها ف دور اخير وتنشر غسيل بينقط على جارتها اللى ناشره غسيل شبه جاف بس اهيه بتشمسه وتهويه فبعد ساعتين تلاته تلاقيه بينقط

فتضطر تحط مشمع او تجيب منشر داخلى او تتصرف اى تصرف وهى بتغلى بعد كتير من العتاب والاخد والرد اللى مبيجيبش نتيجه

ويلف الزمان ويتباع البيت والمالك الجديد يبنى شقه فوقها 

ويرزقها بجاره تهريها نشر غسيل بيشر ميه

الموضوع بسيط عارفه والله وتافه كمان انا فاهمه 

بس العمق هنا ف ان التصرف التافه والعكننه البسيطه اللى كانت بتعملها الجاره اللى فوق
ربنا مسابهاش وداقت من نفس الكاس 

امال بقى اللى بيظلم الناس بجد

اللى بيجور واللى بيخون واللى بياكل الحقوق 
واللى بيتجبر ويفترى بسلطه او عزوه او قوه بدنيه 

اى جبروت بيعمله انسان مهما ظن انه محمى وان مفيش سبيل لان اللى عمله يترد له
بيتفاجئ ازاى ربنا بيلوى ١٠٠ طريق ويغير ١٠٠٠ سكه علشان يلاقى نفسه قدام اللى عمله بالظبط 
بياخد باله ولا لاء الله اعلم 

بس هو انا لو خدت بالى من الاول انى مظلمش حد متعمده 

علشان بخاف ربنا وعلشان عارفه انى هتحساب على افعالى 
وانى هدفع فاتورة اللى عملته مع غيرى ويمكن كمان بالفوايد
يمكن ساعتها اخاف على نفسى لو مش هاخاف من ربى 

بعلم ابنى الصغير الحكايه دى وياريت تعلموها لاولادكم 
داين تدان 
ربنا مبيسيبش 
ومن يعمل مثقال ذرة شرا يره 
ومن يعمل مثقال ذرة خيرا يره

لما مؤمن بيضرب القطه او بيفعص يغل فيها بقوله علطول ربنا هيعمل فيك كده 
 
وفعلا ف نفس اليوم حد من اخواته الكبار يفترى عليه ويجي ليا يبكى ويشتكى 

ساعتها بقوله ذنب القطه

اتعلموها وعلموها لولادكم
فهموا ولادكم ....
ربنا مبيسيبش وبيسامح ف حقه لو قصرت فيه من صوم او صلاه او غيره

وممكن يغفر لك اثم اذيت به نفسك زى شرب خمر او لعب قمار او ذنوب كتيره ما شابه من جرائم بنرتكبها ف حق نفسنا 

انما لا يسامح ف حق عبد من عباده ظلمته وجورت عليه 

بفتكر دايما العباره دى بصوت فيروز الطفله وهى بتقول اذا دعتك قدرتك على ظلم الاخرين فتذكر قدرة الله عليك 

شوفتوا بقى موضوع الغسيل اللى بينقط طلع عميق ازاى 

امال ايه موضوع الكرما ده🤔

ملحقناش معلشان الباميه كانت هتشيط ع النار وانا مشغوله ف الغسيل 
باى بقى نكمل بكره
تمام انتوا عارفين اخر جمله ومحدش بيعملها بس هافضل اقول😓

حواديتى مبيخلصوش ...
وانتوا كمان ف الايك و الكومنت والشير متقصروش ☺

#حكايه_ورا_كل_مثل
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد