#اوبرا_عايده_ج٦#الليله٧٤١

#اوبرا_عايده_ج٦
#الليله٧٤١
واتارى كل الحوار ده لما كان داير  
كان ابوها الملك اموناصرو واقف بيسمع لاء والراجل النطع سايب بنته تقول وتسمع كلام حب مع قائد جيش العدو ... مادام ف النهايه مستنى انها توقعه ف الكلام وتعرف الطريق الامان اللى ممكن يهربوا منه بس تقول ايه؟😏 ما الغايه تبررالوسيله ودول طليان وفرانسويين من الاخر اوربيين دمهم بارد ... لاء مش عايده وابوها انما اللى كتبوا القصه وبيمثلوها 
المهم    
انا كمان مش معترضه على انه يعرف الطريق ويعرف يسلك نفسه ويرجع لبلاده 
بس ليه يخرج عليهم ويكشف نفسه 
ليه يورى القائد رادميس ان حبيبه كانت بتخدعه ومش بتتفق معاه على الهروب ولكن كانت بتوقعه فى الكلام
وعلشان تكمل الوقعه 
ولسه القائد رادميس مفاقش من الصدمه 
ولسه مش عارف يتصرف يقبض عليه ولا يسيبه يهرب معاها ولا يحبسها 
الا ويدخل عليهم عنصر تالت مكانش معمول حسابه خالص
اصل المعبد الطاهر اللى كانوا واقفين قدامه وكان لسه عم رادميس بيحلف لعايده بحياته على صدق حبه لها 
مكانش فاضى 
ولكن ولجل حظهم الاسود كانت فيه الاميره امنيريس لاء و كمان مش لوحدها ولكن كان معاها كبير الكهنه وكانوا بيجهزوا لاستعدادات الزفاف وعماله تختار معاه مكان السيشن و تحدد الاغانى اللى هيشغلها الدى جيه ف الفرح والغنوه السلو هتكون ايه؟
وهيعملوا اكل ايه ف البوفيه
ولسه خارجه هى و كبير الكهنه الا و لقوا البطل المغوار الحاج اموناصرو عمال يتكلم ويبعبع ويعك 
وهوب لقت الاميره امنيريس نفسها قدام خيانه ثلاثية الابعاد
الافندى 
بيخون حبها وبيحب غيرها 
بيخون عهد الزواج اللى اتفق عليه مع ابوها الملك وعاوز يهرب من البلد 
وبيخون بلده بيساعد العدو انه يعرف نقاط الضعف اللى ممكن الاعداء يحتلوا البلاد منه 
لاء ومش بس كده دا معاها كبير الكهنه شاهد عيان 
الا حد يقول متغاظه فعاوزه تلبسه تهمة الخيانه العظمى
وبقت تغنى زى روبى
وانا اقول لاء ميعملهاش دا لازقلى لزقة خفاش 
قمت بقى انت عاملى مفاجأه وبعتنى بيعه من ام بلاش وجتنى البلوه على ساهوه وانا والله مش ناقصه
  
واسقط فى يد رادميس
واللى معرفش ينطق مع كم الصدمات اللى قابلته سواء من حبيبته وظهور ابوها المفاجئ او ظهور عروسة الغفله وكبير الكهنه 
ف الوقت ده جر اموناصرو بنته وهربوا قبل ما يتقبض عليهم 
بس اتقبض على رادميس
ياترى هتعمل ايه ف المحكمه يا غلبان؟ 
وهتقول ايه تدافع عن نفسك وانت متلبس كده ؟
 هنعرف الليله الجايه اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٧٤١
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد