#خاطف_الكلاب_ج١#الليله٤٩
#خاطف_الكلاب_ج١
#الليله٤٩
بقالى سنتين بحكى حواديت يوميه و علشان كده هتنزل كل يوم حكايتين قدام من السنه اللى فاتت و من اللى قبلها دا غير الحكايه جديده
ودى الحدوته اللى عدى عليها سنتين
#خاطف_الكلاب_ج١
#الليله٤٩
لو بتتمشي ف مدينه تورنتو ف كندا سنه 1920 بالليل والناس كلها نايمه ولقيت واحد كده محترم ولابس بدله وعمال يجري ورا كلب
هتستغرب... و هتفكر ف عقلك يمكن كلبه وتايه منه وبيدور عليه
او يمكن هيبيعه ف اسواق الصين وياكلوه مشوي
او يبيعه ف مصر ويعملوه حواوشي
علشان متحيرش نفسك وترمي رغيف الحواوشي من ايدك احب اطمنك
هو بزمتك هتاكل حواوشي معمول بكلب من كندا
دا تلاقيه بالشئ الفلاني
امال الكلاب البلدي ربنا خلقها ليه
سيبك منه الحواوشي دا مش موضوعنا نتكلم عنه بعدين
الموضوع ان الراجل ده بصوره او باخري انقذ حياه حد تعرفه... او حد يهمك او حياتك انت شخصيا
الموضوع بدأ قبلها بسنتين
الاستاذ ده و بالمناسبه اسمه فريدريك بانتنج كان مشارك ف الحرب العالمية الأولى ولما خلصت الحرب بقي عمره ٢٩ سنه
رجع بلده لندن وفتح عياده
والحاله كانت نايمه خالص مفيش ولا زبون بيهوب ناحيته
... والعياده بيصرف عليها بدل ما تصرف عليه
بدا يدور على مصدر دخل
ساعتها فكر يعمل محاضرات ف الجامعة
محاضره منهم كانت عن استقلاب الاطعمه النشويه اللي هو تحولها لطاقه داخل الخلايا بردو مش موضوعنا
نرجع لبانتنج دور علي الابحاث المتوفره وبعدين قرر يزودها ماهو فاضي بقي
يعمل ايه ساب بلده انجلترا وراح تورنتو في كندا
وراح لرئيس قسم الفسيولوجي هناك قاله يا بروفيسور ماكليود انا عندي نظريه ف دماغي كده عن الجلوكوز ف الدم وشايف ان البنكرياس له دور معاها
ايه هو معرفششش؟؟؟؟
فان طالب حق اللجوء العلمي والمعملي لقسمك
اتردد الدكتور ماكليود و لما لقي حماسه قال وماله شباب ماكلنا كنا شباب علي راي الخاله نوسه
ووافق انه يعمل ابحاثه ف معامل الكليه
كده كده ... الاجازه جت و الكليه هتفضي فيها معامل كتيره
اداله معمل مهجور كده وكمان عين له مساعد كده طالب ماجستير
قاله يا تشارلز يا بست خليك جنب الرجل ده متسيبهوش
كان في مساعد تاني اسمه كلارك بس دا عمل قرعه مع بست مين ياخد اجازه وهو كسب وخد اجازته وبست خسر الاجازه مسكين يا بست
نرجع لبروفيسور ماكليود
وكمان علشان يوريهم الجدعنه ادااااااهم ١٠ كلاب يعملوا عليهم تجاربهم
يالااااا .... ماعن حد حوّش
التجارب شغاله ليل نهار من التعب يحتاج د. بانتنج نبيذ علشان يفوق - مش عارفه مالها القهوه يعني - وهو ممعاهوش فلوس فيشرب من الكحول اللي معاه ف المعمل
حاجه اخر تسول
الكلاب العشره تخلص فيضطر العالم العظيم انه ينزل الشوارع يصطاد كلاب ضاله يربطها بحبل ويجرها كيلو مترات للمعمل علشان يكمل تجاربه عليها... اصل الكلاب غاليه في تورنتو
حاجه قمه البؤس
طب بيعمل ايه بالكلاب دي كلها
الموضوع انه بيخلي كلب مريض بالسكر بعد ازالة البنكرياس وتحويله لمريض سكر
طب وبعدين...
خلوا د. بانتنج يرتاح شويه وينام دا طول الليل بيلف ورا الكلاب ف الشوارع
#مش_كل_العلم_تفاحه_وقعت_علي_راس_نيوتن
#دور_علي_شغفك_ع_الحاجه_اللي_بتحبها
#انا_وانت_وساعات_الحظر
#للكلاب_اهميه_اخري_غير_الحراسه_والحواوشي
#ابتسام
تعليقات
إرسال تعليق