#ليله_شم_النسيم_من_البوم_الذكريات#الليله٣٤٤
#ليله_شم_النسيم_من_البوم_الذكريات
#الليله٣٤٤
زى ما لعبنا دوخينى يا لمونه علشان نعرف هو ازاى شم النسيم عباره عن عيد اجتماعى فرعونى اتحول بالصدفه البحته لعيد دينى يهودى
و ان المصرييين اللى بيعشقوا العيد ده رحلوه لما بعد نهاية صومهم الكبير علشان ميخسروش الاحتفال اللى بيحبوه ده
هنزل تحت الروابط 👇
اما بقى ع المستوى الشخصى ف شم النسيم له ذكريات طفوله خاصه به افكار وشخصيات عايشه ف ذاكرتي بتفضل نايمه طول السنه و مبتطلعش الا ف اليوم ده
- زي الشمامه
- البصل والخس والملانه
- وألمبي ابن المبوحه
- و اللبس الجديد
- وشم البحر
اولا الشمامه :
و دي طبقًا لماما شخصيه اسطوريه بتيجي بالليل واحنا نايمين يوم الاحد بالليل تشمنا ولو لقتنا مستحميين تشمنا💁♀️ تدعيلى وتقولى :
الله🥰 روحي ان اشا الله كل سنه وانتي نضيفه💁♀️
اما لو لقتنا مش مستحميين😏
فبتقول اف اف 🤦♀️روحي ان شاءالله كل سنه وانتي معفنه 🥵
ومع اني مش عارفه تروحي فين اللي بتقولها دي
ومع انى مش عارفه هى بتروح فين هى شخصياً وتغطس طول السنه علشان تفط تخلص شغلها كله ف ليله واحده ترجع تانى تنام للسنه اللى بعدها
وكأن الزمن يأبى علينا اطفال مصر الا النكد
فلو دورت ف الحضاره الاوربيه عن الشخصيه الشبيهه لها و اللى صايعه طول السنه وبتشتغل يوم واحد ف السنه فتلاقيها بابا نويل ودا راجل جدع ومع انه عجوز زي الشمامه بس لطيف وبيوزع هدايا
انما احنا لاء ...
ليه لما ربنا يكرمنا كاطفال مصريين وتكون لنا شخصيه خياليه خاصه بنا
تكون عجوز شمطاء مرعبه تيجى علشان تشمنا وتدعى علينا بالعفانه لو لقتنا متوسخين
عموما كانت شخصيه مكروهه جداً منى وكنت بخاف منها واخاف تقلب عليا وتخلينى افضل معفنه طول السنه
خصوصاً انى كان عندى اشيوز معينه مع الحموم والصابون ف العنين والمرمطه اللى بنتمرمطها والخنقه بتاعة وابور الجاز اللى شغال له اكتر من ساعه علشان ال يدفى الحمام ال
و لكن علشان كنت بخاف منها كنت بسمع الكلام واستحمل عملية السلخ بالميه السخنه والليفه الخشنه والفرهده والزنهره مقابل انى افضل طول السنه نضيفه ومتدعيش عليا الشمامه👹
مش عارفه كنا هبل ازاى وبنصدق كده ولا اساسا ايه اصرار اهالينا على الحمايه دى ؟
طبعا لازم نبات مستحميين امال، الشمامه تشمنا وتدعي علينا 😏
بابا بقي ☺
يسكت لاء ابويا الله يرحمه كان قارئ نهم وخصوصا للتاريخ الفرعوني لدرجه عارفهم وعارف اعمال اغلب ملوكهم وكنت ومازلت بحسده دا كان عارف ملوك باعملهم اعتقد انى حتى معرفش اساميهم
وتلاقيه مالوش كتاب ف مكتبته الا و مليان بالتعليقات اللى كاتبها ف الهوامش
المهم نرجع لشم النسيم
كان ليله الحد يجيب خس🥬 وملانه منزله صورتها تحت 👇 وجزر🥕 و بصل اخضر🧅
يخرج مخصوص هو علشان يشتريهم علشان عارف ان ماما مش هترضى تشتريهم وهى بتتسوق😂😂
ويحطهم فوق دماغنا انا واخويا واحنا نايمين
وماما تتخانق معاه يا عم بصل ايه اللي فوق دماغ العيال وهم مستحميين
وبعدين الملانه دي بيبقي فيها برغيت هتملالنا السرير برغيت
وتقوم الخناقه السنويه المعتاده
بابا مصمم ويقولها دي عادات فرعونيه وعاوز ولادي يبقوا زي اجدادهم الفراعنه وبعدين دا فأل بركه
وهى تقريبا بتعترض احسن الشمامه لما تيجى تشمنا مناخيرها تخبط ف البصل وتفتكرنا مستحميناش وتدعى علينا بالعفانه طول السنه واهو كله ف وش ماما بردو لما ولادها الاتنين يبقوا معفنين سنه كامله وحشه ف حقها مفيش كلام
اما على المستوى الشخصى ف تبقي مش عارف تلاقيها من البرغيت ولا من الشمامه 😔
ودا كانوا فقرتين ثابتين ف استعدادات ليلة شم النسيم
بالليل بس بدري شويه عن خناقة ماما مع بابا والملانه والبراغيت
وخناقة ماما معانا والحموم والشمامه
بيكون في حاجات غريبه بتحصل ف الشارع الشباب بيتجمعوا و بيعملوا حاجه زي خيال المأته بيكون اسمه ألمبي
سبب التسمية دى (اللمبي) كان تحريف لاسم اللورد "إدموند هنري ألنبي" المندوب السامي لبريطانيا فى مصر سنه ١٩١٧ واللى اتعرف ببطشه بالمصريين
وف يوم كان مفروض أنه يزور بورسعيد قوم البورسعيديه يسكتوا ابدأ دول لازم يرحبوا به ويكرموه التكريم اللائق بسيادته
ويخلوه ييجى يتفسح ف بلدهم ويحرق دمهم
ابداً دول اول حاجه رفضوا استقباله
وتانى حاجه عملوا مظاهرة كبيرة مرددين أغنيه الفوها
بتقول "يا ألمبى يا بن اللمبوحة .. مين قالك تتجوز توحة"
واستمرت الحكايه سنه ورا سنه حتى بعد رحيل الانجليز
وحتى بعد قيام حرب ١٩٦٧ وترحيلهم من مدن القناه علشان ييجوا يعيشوا ف الوادى والدلتا وجنبنا كان فى كتير بوسعيديه بيعملوا طقوس الاحتفال كل سنه
وفضلوا كل سنه يعملوا كده ويحرقوا فيها دمية تمثل اللورد
وعلشان كده يعملوا المجسم ده بالحجم الطبيعي كانوا من الضهر كده بيجيبوا قميص وبطلون يكونوا قدام عند حد ويحشوهم قطن او هدوم قديمه ويركبوه على خشبتين كده بعلامه زائد زى خيال المأته
ويفضلوا بعد العشا يلفوا به الشوارع وهم بيشتموه بغنوه طويله مش فاكره منها
الا يا اللمبي... يابن اللمبوحه مين قالت تتجوز توحه
ويألمبى يا ابن المبوحه
ومراتك حلوه و مفض***
وكانت ماما تزعقلي، مرددش الكلام ده وراهم لانه عيب
وبعد شوية جرى للشباب دول وفرهده كتير حوالين الحى يتجمعوا ف مكان واسع ويولعوا ف المبى وتنتهى بكده اهم طقوس الليله فيما قبل حمومى والشمامه
ندخل ننام الساعه ٨ زى ما متعودين
كان نفسى اكمل الذكريات واقلب تانى ف البوم ذكرياتشى عن اليوم ده
بس البوست طول اوى وكده شهريار اللى هو حضراتكم
هتناموا منى ويقع الموبايل من اديكم
وحرصا على ان النوم ميكبسش وانتوا بتقروا ويقع الموبايل من ايدكم وهو مفتوح ويقع ساعتها ف ايد عايشه مستنيه اللحظه دى انكم تنامو والموبايل مفتوح😉
وانا كله عندى الا خراب البيوت ... اه
فحرصا على بيوت قارئينى من الرجال
ورصيد الداتا بتاع الامهات اللى هيضيعوه الذئاب الصغار اللى بردو بيترصوا بالموبايل يقع مفتوح من ايد ماما ...بقول أأجل الباقى لبكره
وكفى الله المؤمنين القتال
حواديتى مبيخلصوش ...
وانتوا كمان ف الليك و الكومنت والشير متقصروش ☺
#ابتسام
تعليقات
إرسال تعليق