#ليه_شم_النسيم_يوم_الاثنين#الليله٣٤٢

#ليه_شم_النسيم_يوم_الاثنين

#الليله٣٤٢

سؤال كان كتير بيحيرنى 

وكمان كنت بسأل ليه تانى يوم عيد القيامه تحديداً ؟؟

طيب ليه كل مره بيتغير مواعيده من سنه لسنه ؟؟

طب هو مرتبط بالفراعنه ؟؟

ولا باليهود ؟؟

ولا بالمسيحيين ؟؟

عاوزاكم تطولوا بالكم معايا لان الحكايه طويله ولافه 

انا من زمان الموضوع ده محيرنى ولما كنت بسأل صاحباتى من المسيحيات مكنتش بفهم حاجه 

واشك انهم اصلاً فاهمين بيتحسب ازاى 

وفعلا فى واحده قالتلى انها بتتحسب ف المجمع المقدس وهم اللى بيحددوه كل سنه ولما حاولت افهم اكتر مالقيتش اجابه

بالمناسبه صاحبتى دى اللى كنت بسالها وقالتلى المجمع المقدس كانت صعيديه ومن اللى لسانها مش واخد لهجة القاهره كمان مع انها قاهريه بس بتتكلم صعيدى  

اول ما شفتها كنت هتجنن انا عارفاها كويس واكيد شفتها كتير كمان بس فين؟ وامتى ؟

لحد ما فجاه نورت لمبه ف دماغى 

دى نيكول كيدمان

اه والله هى الخالق الناطق باستثناء اللهجه الصعيدى اكيد نيكول بتتكلم بلكنه استرالى اكتر 

والله ما هتصدقوا حتى لون الشعر وشكله وطوله والجمله الاعتراضيه اللى ملهاش ٦٠ لازمه دى موجهه للمخرج محمد سامى والصعايده اللى مصديهم كلهم ماعدا اخته ومراته 

صورة نيكول تحت للى مش فاكرينها👇

طيب نسيب المسلسل ونسيب نيكول كيدمن الصعيد ونرجع لشم النسيم 

و تعالوا نسلسل الموضوع من اوله 

اه يبقى نبدأ من الاول من عند قدماء المصريين 

العيد ده مصرى قديم كان يعتبر عيد للحصاد بيحتفل به المصريين

احنا عارفين اد ايه اجدادنا كانوا بارعين ف الفلك وعلومه علشان كده كان اليوم اللى بيتساوى فيه طول الليل والنهار و هو اليوم ده هو يوم العيد 

ودا لما تدخل الشمس فى برج الحمل 

مش فاهم ؟؟؟🤔

ولا انا بس هم كانوا فاهمين☺

المهم ان دا كان بيتم من ايام زمااااان من ايام الاسره الثالثه يعني عام ٢٧٠٠ ق.م

يعنى قديم قدم الاهرام 

وكان اجدادنا القدماء بيحتفلوا فيه من اول شروق الشمس لحد غروبها كانت البنات بتلبس عقود الياسمين والاطفال يمسكوا سعف النخيل اللى مزينينه وبالالوان والزهور

وتشتغل الالات الموسيقيه من قيثار والناي والمزمار والطبول والدفوف 

وكان له اغاني خاصه بالايام دي تحديدا كمان كان في مباريات رياضيه وحفلات تمثيليه

كان اسمه مكون من ٣ مقاطع

 ١ - شوم swm يعني بستان 

٢ - نيسيم nicim يعنى الزروع 

٣ - وحرف إن بينهم للربط زى حرف of اللى في الإنجليزي

 فتبقى الكلمة "شوم إن نسيم" يعنى "بستان الزروع"

لانهم ف اليوم ده كانوا بيخرجوا للبساتين والحدائق وعلى شط النيل معاهم البيض والسمك اللى مملحينه وخضروات زى الخس والملانه ( اللى هى الحمص وهو لسه اخضر ف فروعه ) والبصل الاخضر 

وغيرهم من فاكهه او خضار ويحتفلوا ويهيصوا 

وتعالوا نتكلم عن كل حاجه من الاكل لوحدها 

البيض الملون : 

و ده كان حكايه هو موجود من ايام الفراعنه وكان له ميزه دينيه لانه كان بيرمز عندهم لبدايه الخلق ... 

خلق الحياه زي ما جه في كتاب الموتى و اناشيد اخناتون 

(ميجيش حد تانى يسال البيضه الاول ولا الفرخه اهم الفراعنه حسموها خلاص اهه) مع اختلافى معاهم ف الجزئيه دى 

وكان لازم تبدا الشعائر المقدسه باكل البيض

 اما النقش على البيض اللي بيبهرونا به الروس كل سنه والاوروبيين فده برده كان من عند الفراعنه لانهم كانوا بينقشوا عليه الامنيات والدعوات ويعلقوه في اشجار الجناين علشان الاله (رع اللى هو يرمز له بقرص الشمس) لما يشرق يتلقى بركاته وتتحقق دعواتهم

هنزل صور للحفر ع البيض وصور للبيض اللى بيعمله الروس من الخزف او من الجواهر وبيكون باسعار خرافيه 

واما الفسيخ ف بردو ده كان له اهميه كبيره يعني هم كانوا معتقدين انا اكله له فائده صحيه ما ف وقت معين من السنه 

وكان فيه نوع محدد من السمك كان اسمه بور اللي احنا دلوقتى بنقول عليه السمك البوري 

اما اكل البصل تحديدا لان كان قصه هى السبب ف انهم ياكلوه ف اليوم ده والقصه بتقول انه :

كان ياما كان كان فى زمان امير صغير في الاسره الفرعونيه السادسه تعب قوي و عجز الاطباء عن شفاءوه واضح انها كانت حالة تسمم وواضح ان التسمم كان من السمك المملح وبعد ما غلب الكهنه الاطبه ف علاجه لحد جه كاهن و راح مأكله بصله خضراء ساعتها الطفل ابتدى يخف حالته تتحسن 

وعلشان كده دائما الفراعنه كانوا بيهتموا بانه يكون البصل الاخضر مع السمك المملح كنوع من علاج اي تسمم ممكن يحصل

وفضل الحال كده متغيرش ف حاجه 

الا يوم من الايام حصل موقف عارض ف حياة المصريين ولكن اثر على بنى اسرائيل 

الا وهو سيدنا موسى و اليهود اللى كانوا عايشين ف مصر 

واللى حكيت جزء من حكايتهم وهو الجزء الخاص باقامتهم ف مصر ف ١٨ جزء هاسيب روابطهم هنا👇

المهم ان الاجزاء انتهت بخروج بنى اسرائيل من مصر 

بعد ما ربنا امر البحر فإنشق لسيدنا موسى واغرق ال فرعون 

ودا كان يوافق ايه ؟؟؟ 

شاطرين 

بستان الزروع شمو

او زى ما بنقول دلوقتى شم النسيم 

او زى ما بيقولوا عليه اليهود عيد الفصح 

وطبعا اليهود بيحتفلوا احتفال كبير اوى باليوم ده وبيفضلوا يحتفلوا .. ويحتفلوا .. ويحتفلوا ٧ ايام 

وزى ما ورد ف كتابهم 

وهم بيقولوا ...طب ما تيجوا نسمع منهم هم :

((وقال موسى للشعب اذكروا هذا اليوم الذي فيه خرجتم من مصر من بيت العبودية فانه بيد قوية اخرجكم الرب من هنا ولا يؤكل خمير اليوم أنتم خارجون في شهر أبيب ويكون متى أدخلك الرب أرض الكنعانيين))

((سبعة أيام تأكل فطيراً وفي اليوم السابع عيد للرب فطير يؤكل السبعة الأيام ولا يرى عندك مختمر ولا يرى عندك خمير في جميع تخومك. وتخبر ابنك في ذلك اليوم قائلا من أجل ما صنع إلي الرب حين اخرجني من مصر. ويكون لك علامة على يدك وتذكاراً بين عينيك لكي تكون شريعة الرب في فمك لانه بيد قوية أخرجك الرب من مصر. فتحفظ هذه الفريضة في وقتها من سنة إلى سنة )) (سفر الخروج، أصحاح 13، 3-10)

علفكره موضوع الخمير ده يعنى مفيش بيت يبقى فيه عيش متخمر ولا اى حاجه متخمره موجوده جوه بيوتهم ودا له حكايه بنت ايه  

مسيرى احكيها عن التلاعب اللى هم بيعملوه علشان موضوع المتخمر ده 

مش وقتها دلوقتى بس توريك اد ايه مبيتعلموش مهما ربنا يعمل فيهم 

نرجع لموضوعنا 

حلو هم كده قالوا ان دا عيد مهم جدا دا اهم اعيادهم يوم ما نجاهم ربنا من بطش فرعون 

بس ماله وما العيد عندنا بردوا ؟؟؟

و دا اسمحولى اكمله بكره 

وساعتها هنعرف ليه المصريين القدماء والمصريين الحاليين واليهود و النصارى 

وبابا وناهد وكلنا بنحتفل باليوم ده 

كمان هنشوف التركيبه المشبكه اللى ربطتنا بالاحد والاثنين تحديدا 

وليه بيختلف معاده من سنه لسنه 

حواديتى مبيخلصوش ...

وانتوا كمان ف الليك و الكومنت والشير متقصروش ☺

#شم_النسيم_اللى_محتار_معانا

#ابتسام