#ليله_شم_النسيم_من_البوم_الذكريات_ج٢الاخيره#الليله٣٤٥
#ليله_شم_النسيم_من_البوم_الذكريات_ج٢الاخيره
#الليله٣٤٥
وبعد ما خلصنا من حكاية الشمامه واللمبى والخس والملانه والبراغيت
ندخل ننام بس فى حاجه مهمه اوى فى الليله دى لسه هتحصل ودا مبيحصلش الا ليلتها بس دوناً عن كل ليالى السنه حتى ف الاعياد
هاحكيلكم
صلوا ع النبى ☺
احنا طبعا بندخل ننام الساعه ٨ زى ما متعودين كل ليله
اه ما هم لازم يدخلونا الساعه ٨ ننام
ونفضل بقى
اشرب ... ادخل حمام اشرب ...ادخل حمام
اشرب ... ادخل حمام
زهقتوا ماشى بس انا مكنتش بزهق مع ان
بابا وماما كانوا بيزهقوا مش عارفه ليه🙃 ؟؟؟
ومع ان الموضوع لايتعدى كونه طفله صغيره بتلبى نداءات الطبيعه المختلفه🤭
طبعا كان كدب وكنت لئيمه ومفيش حد كل ٥ او ١٠ دقايق يعطش او يتزنق
بس يعنى ماهو مش اصول بردو
ليه يعنى نتخمد احنا من ٨ وهم يسهروا يتفرجوا ع التليفزيون؟
دا كانوا ممكن يكملوا لحد ١١ ... وساعات ١٢ بالليل كمان😳
اه ... ماهم كبار بقى ...😒
براحتهم ... يفتروا😏
بس دا كله كان بيبقى ف الليالى العاديه مش ليلة شم النسيم
ومع اننا كانوا بيخمدونا عادى بردو ٨ بالليل بعد الفرجه على حرق اللمبى والتمثيل بالماكت بتاعه
و علقة الحموم والتمثيل بالجلد بتاعنا علشان ست الشمامه تستريح
بس الغريب ان الليله دى اى وقت تقلق وتصحى تدخل الحمام بجد المرادى 😉
كنت الاقى بابا وماما قاعدين ومشغلين التليفزيون وبيتفرجوا على حفله
اصل الليله دى من الليالى القليله اللى التليفزيون فيها ميطفيش الساعه ١ ولكن يفضل مكمل مع حفلة عيد الربيع
ودى ذكرياتى معاها مش كتير بس كفايه انك تعرف ان اغلب الحفلات اللى بيعرضها التليفزيون للحفلات الابيض والاسود دى كانت بتبقى ليلة شم النسيم الخناقات اللى بنسمع عنها بقى زى عبد الحليم وفريد الاطرش
وبعد عبد الحليم وفريد ما توفاهم الله كانت لازم يحييها مطرب او مطربه كبيره نجاه بقى او فايزه احمد واللى اعتقد الاجيال الجديده مش عارفين شكلهم او اساميهم مش بس حافظين اغانيهم زينا
و بالتالى كان التليفزيون بيفضل شغال
شغال لحد ما الحفله تخلص الحفله حتى لو فضلت ل٣ او ل ½و٣ الصبح😳
وهو امر لو تعلمون سحرى غريب عجيب
ويطلع النهار نهار شم النسيم
واللى لازم البس فيه فستانى الجديد
اه اصل لازم كل سنه يجيلى لبس جديد ف ٣ مناسبات :
العيد الصغير
العيد الكبير
شم النسيم
وفضلنا على الحال ده لحد ما ف يوم جابتلى عمتى هديه سويت شيرت خريفى جميل احمر قانى بلون فصيله الدم o
وساعتها ماما بتلقائيه قالتلى قدام عمتى حلو خليه بقى تلبسيه ف شم النسيم
وساعتها عمتى قالت لها😳 هو انت بتجيبى لابتسام هدوم جديده ف شم النسيم
فماما ببرائه قالت لها اه
تقوم عمتى ترد تقولها انا بجيب لبنتى ف العيد الكبير والعيد الصغير بس
ومتفهمش ماما شبطت ف الكلمه
وكان التى شيرت الجميل الاحمر القانى اللى بلون فصيلة الدم O اخر لبس جديد البسه ف شم النسيم
شكراً يا عمتو😥
#شم_البحر
وبما اننا من عيله محافظه
محافظه جدا
محافظه جدا على الحبسه ف البيت ف الاعياد علشان مينفعش نخرج ف الزحمه وكأن الزحمه دى عاملينها سكان الكواكب الاخرى اللى بيحتلوا كوكبنا ف اليوم ده مش مصريين بيحتفلوا زينا
الا انه عيب طبعا وبلاش بهدله وقلة قيمه فكان اليوم بينتهى ف البيت اننا نلون البيض و بان بابايا رحمة الله عليه استاذ ف الرسم
وكان بيرسم عليه اشكال روعه كانت تستاهل تتبروز والله مش تطقش ف الدماغ وتتاكل
الا وف مره اتفقت ماما مع مرات خالي وخرجنا معاهم
الاول روحنا علي كورنيش النيل ف روض الفرج ٦ الصبح وده اسمه شم البحر وهناك الناس بيشتروا القلل الجديده اللي هتقعد طول السنه
وفي ناس كانوا بيملوها من النيل علشان يعني تكون فأل خير
وبعد كده في عربيات كاروو محمله نعناع
وعربيات تانيه محمله ورد بلدي وقرنفل
اه والله عربيات كاروو مليانه والناس تشتري وتحط ف القلل وتروح
احنا مشتريناش قلل بس اشتريت فل بكل الالوان
تقريباً كانت الفله بقرشين
وكعيت ييجى بريزه ساعتها
طول عمرى مسرفه😠
وبعد كده بقي رجعنا البيت تانى جهزوا مستلزمات الرحله من ملايه واكل وترمس وخلافه
و خرجنا ورحنا جنينه الحريه اللي ف الجزيره
بصراحه كانت اسم على مسمى كلنا خدنا حريتنا فيها .... وتوهنا
اه والله كانت رحله جميله لا يعيبها الا اننا احنا ال ٦ قضينا اليوم توهان
انا واخويا وولاد خالي الاربعه
كان يرجع حد مننا يتوه التاني يرجع التانى يتوه التالت
وختمت باحمد ابن خالى كان اصغرنا ٣ سنين ودا لففنا الجنينه عليه خمس او ٦ مرات لحد ما اقتنعنا اننا مش هنشوفه تانى وان حد خده ف ايده وخرج من الجنينه
وفضلنا علي كده لحد ما لقيناه عند بوابة الجنينه لما لحقوه الامن وهو خارج يفسح نفسه بره الجنينه
المهم اننا روحنا المغرب مكسرين بس معانا احمد اللى الحمد لله مكانش اتعمل فيلم المولد ساعتها والا كنا خرجنا ندور على عبد الله فرغلى وهو واخد هيمه قصدى احمد علشان يربيه مع اماره
وطبعا كانت اول مره اقضى شم النسيم مع الفضائيين اللى محتلين كوكب القاهره ويا سبحان الله لقيناهم ناس مصريين زينا لاء و لقينا مكان نفرش ملايتنا فيه
وهنا يحضرنى حال ريبونزل وهى عاوزه تتفرج على نجوم السما او القناديل المنوره وانا نفسى اشوف ف السما قناديل
و كمان كنا بنلعب و دا ف الاوقات القليله بين اننا تايهين او بندور على حد تايه مننا
بس كانت التجربه دى كفيله انها تقنع ماما انه يستحيل نخرج تانى ف شم النسيم
ولما نغلط واقولها ايه مش فاكره لما خرجنا مع ولاد خالوا ؟
تقولنا اه فاكره بطريقة خلينى ساكته بدل ما اتفتح فيكم 🩴
فنتكتم 🤫
كان يوم جميل وكل سنه افتكره وببقي نفسي اروح اشم البحر بس 😏
من غير جنينه الحريه
بس الحرمان من الخروج دا كان بيبقى ف عيد شم النسيم بس
اصلاً يعنى .. دا مش عيدنا
احنا عيدنا العيد الصغير والعيد الكبير
ودول كنا طبعا لازم نخرج فيهم 🙆♀️
بتقولوا نروح جناين ؟؟؟
جناين ايه ...؟؟؟؟
جناين حد جاب سيرة جناين ؟؟؟
العيد دا علشان نطلع القرافه علشان نزور اهالينا اللى ماتوا ونعرفهم اننا مش ناسيينهم ونتعلم ونتعظ ..لاء عاجبانى كلمة نستوعظ
ونستوعظ
ولكن لهذا حكاية اخرى
يمكن ابقى احكيها لكم ع العيد😂😂 وابئسكوا قصدى وابسطكوا
عموما يعنى
شم النسيم السنادى جه ف الكورونه زى السنه اللى فاتت
وجه ف رمضان ودى حركه جديده منه منعت اى احتفال ولو حتى ان دورز
ونبقى نلون الكحك بقى
بلا شم نسيم بلا كلام فارغ
اساسا مينفعش نخرج ف الزحمه🤐
اه اصل جوزى طلع يقرب لابويا وامى اكتر منى ومقتنع ان مينفعش نخرج ف شم النسيم والبهدله
عموما انتوا عارفين ....
حواديتى مبيخلصوش ...
وانتوا كمان ف الليك و الكومنت والشير متقصروش ☺
#ابتسام
تعليقات
إرسال تعليق