#ابو_وش_احمر #الليله٣٣٩

#ابو_وش_احمر 

#الليله٣٣٩ 

وانا صغيره خالص سنتين تلاته كده كان عندى غِيه (هوايه) يعنى الا وهى انى اقف ابص من الشباك على الشارع 

وكانت مش بتبقى وقفه عاديه لاء ابسليوتلى ولكن كنت ماما مسميانى النداهه .... اه والله

وكما يذكر ف الاثر من ماما الله يرحمها انى كنت رغايه وغلباويه 

ومعتقش حد من الجيران طالع ولا نازل الا اما انده عليه و افضل ارغى معاه 

وازيك يا خالتى فلانه وازيك يا عمو فلان 

وطبعا الكل كان بيحب بيسلم ويتكلم 😊

خصوصاً اننا ف الارضى مما يجعلنى قريبه من الزبون اللى برغى معاها او معاه 

وكنت كده مع اى حد 

لازم انده عليهم 

من اول جاره لحد (ساأيد يا منن) ... الترجمه سعيد يا بياع اللبن 

كنت صديقة كل الناس 

ومحبوبه الجماهير كل الناس بحبهم وبيحبونى 

ماعدا واحد بس ...

هو صراحه مكانش بيكرهنى 

ولا بيحبنى 

ولا يعرف اساسا انى موجوده ف الوجود 

كان راجل سائل ( شحات )

مش فاكره الا انه كان طول بعرض ملاحظه كده ان اى حد ساعتها كان هيبقى طول بعرض نظراً لحجمى الزعنطط بزياده

بس دا كان فعلاً طول بعرض مما يزيده هيبه ورهبه 

وكان بيلبس جلابيه بيضا ونضيفه وطربوش احمر😳 

وان كانت هنا بعض الغرابه لانى بتفرج طول الوقت على الرجاله ف التليفزيون اللى بيكونوا لابسين طرابيش ف الافلام والمسلسلات اللى بتتكلم عن الفتره دى 

وكانت كلها بتبقى طرابيش سودا 

بس مكنتش واخده بالى ولا فاهمه ( ودا لحد ما كبرت بالمناسبه🥺 ) 

انه علشان التليفزيون ابيض واسود علشان كده كانت بتبقى الطرابيش سودا 😅

انما الراجل ده كان لابس طربوش احمر😳

منعرفش اسمه بس كنا مسميينه ( ابو وش احمر ) 

كان تقريبا بيقول ... (مليم لله )

ومع ان المليم كان اتلغى والعمله اللى ماشيه القرش والتعريفه 

الا انه كان بيكسفك تقريبا ان طلباته قليله فتديله قرش ولا تعريفه 

زى ما سائل يطلب منك دلوقتى ربع جنيه اكيد مش هتديله ربع جنيه لكن جنيه مثلاً او خمسه

اما سبب تسميته ابو وش احمر فهو ان كان وشه احمر جدا 

عارف الشخص الابيض اوى لما يجرى كتير او يكون محموم ووشه بيحمر خالص او زى المزارعين بتوع استراليا كده 

المهم ان دا كان السبب اللى مميزه ومغير شكله عن باقى خلق الله اللى انا اعرفهم المهم ان ماما لما كبرت بعدها قالتلى انه كان اشهب او من اعداء الشمس ... علشان كده كان وشه بيكون احمر اوى يعنى لونه بينك كده 

ومع ان كان لنا بعد ما كبرت شويه ناس جيرانا من اعداء الشمس وعمرى ما خفت منهم ولا اساسا فرق معايا لون البشره بس بردو كانوا لونهم ابيض اوى عادى 

دا تقريبا يا عينى من كتر المشى ف الشمس حصله اللون الغريب ده ف وشه او كانت طفره انا مقدرش احكم بردو بسبب صغر سنى وقتها 

بس الراجل ده كنت بترعب منه 

ولما كنت مسمعش كلام ماما ومشربش اللبن 

اه والله انا من الجيل اللى كان بيتحايلوا عليه يشرب اللبن ويجروا ورانا بالكوبايه 

فكانت ماما تقولى اشربى اللبن والا هجيب لك ابو وش احمر 

ادخلى نامى والا هاجيب ابو وش احمر 

كان ابو وش احمر ده ذلتى ف الدنيا 

ايه اللى حصل مع صديقى مصدر رعبى وخوفى وذلى ابو وش احمر ... 

دا نكمله الليله الجايه لو كنت مهتم يعنى 

حواديتى مبيخلصوش ...

وانتوا كمان ف الليك و الكومنت والشير متقصروش ☺

  

#ذكريات_طفولتشى١

#ابتسام