#ليه_شم_النسيم_يوم_الاثنين_ج٢#الليله٣٤٣

#ليه_شم_النسيم_يوم_الاثنين_ج٢
#الليله٣٤٣
اتفقنا الليله اللى فاتت ان الصدفه خلت عيد شم النسيم المصرى هو بردو عيد مهم عند اليهود ويعتبر من اهم اعيادهم يوم ما نجاهم ربنا من بطش فرعون او ما يسمى بعيد الفصح
ودى كده اجابة سؤال انه ليه عيد عند اليهود 
طيب والمسيحيين ؟
مالهم ؟
ليه ربطوه عندهم بعيد القيامه ؟
واشمعنى يعنى ده ورا ده
الحكايه ان من حوالى ٢٠٠٠ سنه اتولد سيدنا عيسى عليه السلام 
- وعاش بين الناس يدعوهم لعبادة ربنا 
= اه عارفه عارفه وترك عباده الاصنام 
- لاء غلط .... سيدنا عيسى مدعاش لترك الاصنام 
= ياسلام يعنى كان سايب عبادتها عادى 
- بردو لاء
المجتمع اللى اتولد وعاش فيه سيدنا عيسى مكانش فيه اصنام ولكن كان مجتمع موحد بالله ... كانوا اليهود شعب الله المختار زى ما دايما بيقولوا على نفسهم علشان كده كان كل دعوته لهم انهم يرجعوا لصحيح الدين اللى نزل على سيدنا موسى والانبياء من قبله وبعده
يعنى صحيح الدين بلا كذب على الله ولا تحريف ف كتابه 
= يعنى شعب اليهود كان موحد صح كده 
 -يعنى مش موحد اوى 
هم المفروض انهم كديانه سماويه وبيقولوا انهم شعب الله المختار يبقوا ميعبدوش الا الله
بس علشان الرومان اللى كانوا بيحكموهم كانوا بيعبدوا الاصنام والاباطره ( جمع امبراطور ودا لقب الملوك بتاعتهم مش نوع الملابس بتاعة اعلانات رمضان )
فعلشان ميزعلوش منهم الساده الرومان قالوا يعنى مش مشكله اننا نعبد الاباطره مع الله طبعا شرك والعياذ بالله بس دا طبع ولاد العم الغايه تبرر الوسيله
طبعا سيدنا عيسى معجبهوش اللى بيقولوه ومن هنا هم معجبهمش سيدنا عيسى كله 
وتأمروا عليه بالحكايه المشهوره 
واللى بقالى كتير عاوزه اتكلم فيها المهم خانه اليهود وقرروا يسلموه للرومان يعدموه 
وخانه تلميده يهوذا وبلغ عنه جنود الرومان 
ولحد هنا واختلفت الروايتين المسيحيه والاسلاميه واحنا مش ف مجال التقرير مين الصح واصل الحكايه ايه
ولكن نهدف لاننا نعرف ليه المسيحيين بيحتفلوا فى الميعاد ده تحديدا 
عدت سنين كتيره 
ودخلت المسيحيه مصر بعد رفع سيدنا عيسى 
وانتشرت المسيحيه فى كل عموم مصر ومفيش بيت الا وهو مؤمن فى القرن الرابع الميلادى 
وهنا بقت مشكله عند المصريين اللى كلهم مسيحين ف الوقت ده 
هم بيحتفلوا بالعيد الفرعونى بتاعهم
ولكن ميقدروش طول ما هم صايمين الصيام الكبير انهم يحتفلوا بعيد شم النسيم لان دايماً العيد الفرعونى ده بيض وسمك ودا اساساً مينفعش ف الصيام الكبير اللى ممنوع فيه اى حاجه حيوانيه 
يبقى الحل انهم يأجلوه لما بعد الصيام يحددوا ميعاد نهايه الصيام بنهاية اسبوع الالام واللى بينتهى بيوم الاحد اللى هو عيد القيامه (قيامة السيد المسيح حسب المعتقد المسيحى )
واللى هم عارفين انه كان بعد عيد الفصح اليهودى 
وعلشان التقويم اليهودى ملخبط ميكس شمسى وقمرى 
المهم ان تانى يوم عيد القيامه اللى لازم يكون يوم احد فيكون شم النسيم ياليوم التالى له علطول يوم الاثنين علشان يبقى العيد عيدين ونحتفل باعيادنا القديمه كقدماء مصريين والعيد الجديد بتاعنا كمسيحيين 
ازاى بيتحدد بقى عيد القيامه فده زى ما صاحبتى نيكول كيدمن الصعيديه ما قالتلى انه صعب يتحسب 
ولان هو فعلا صعب يتحسب 
 هو حساب فلكى معقد اسمه حساب ( الابقطى Epacteو هى كلمه معناها عُمر القمر فى بداية شهر توت ) واهم شروطه 
١ - انه لازم يكون يوم أحد 
٢ - يكون بعد عيد فصح اليهود 
٣ - بعد الاعتدال الربيعى اللى بيكون ٢١مارس
الخلاصه انه يكون بعد الاسبوع الاول من ابريل وقبل الاسبوع الاول من مايو 
المهم انهم رابطينه بذبح خروف الفصح عند اليهود وليله كبيره مش هنفهم ازاى بتتعمل 
بس ادينا عرفنا ليه عيد القيامه بيكون 
يوم احد ...وبعد عيد الفصح اليهودى 
وليه لازم تانى يوم بيكون عيد شم النسيم 
وكل سنه وانتم طيبين مسلمين مسيحين يهود بس مش اسرائيلين 
حواديتى مبيخلصوش ...
وانتوا كمان ف الليك و الكومنت والشير متقصروش ☺

#شم_النسيم_اللى_محتار_معانا٢
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد