الف حكايه وحكايه مع ابتسام الصاوى

#جمعة_الغضب_٢٨يناير٢٠١١(٤)  #الليله٢٥٢ طبعا انا كعضو مؤسس لحزب الكنبه وبدون ما ادفع اشتراك كمان  متابعين على التليفزيون . ولانى طول عمرى بشغل دماغى مكانش اى حد اتابعه و عارفه ان فى كتير ميتشافوش لفجاجة نفاقهم وكدبهم  كنت بشوف تقريبا منى الشاذلى بس  وافتكر ان منى الشاذلى ف العاشره مساًء   ( اه ... العاشره مسأء كان بتاع منى الشاذلى من اول ما طلع ) فاكراها وهى بتتكلم مع الناس اللى بيتصلوا  بتحاول تنقل للجيش لو فى مكان فيه خطر وكل الناس بتصل خايفه وقلقانه من حاجه واحده بس البلطجيه  وجملتها المحترمه جدا محدش يقول سمعت اللى بيحصله حاجه او شاف بعينه بس يحكى  فى حين ان قنوات ومذيعين كتير عمالين يزودوا البلبله والقلق واتصلت بيها زميلتها المذيعه ايتن نجاح الموجى بتقولها ان البلطجيه حوالينا والحقونا خلوا الجيش ييجى  وهى سألتها شوفتى بعينك  تقولها لاء بس الناس منهاره وبيقولوا انهم على بوابات الكومباوند اللى ساكنه فيه تقولها اسفه يا ايتن بس مادام مش شايفه  بعينك منقدرش نعتبرها شهاده  وقالتلها فيما معناه اهدى وقفلى بابك كويس  واتصل...

#الجمعه_٢٨_يناير_٢٠١١(١) #الليله٢٤٩ حكيت عنها ف يوم الجمعه لانها ارتبطت عندنا كلنا بجمعة الغضب  بالنسبه ليا ثورة يناير كانت يوم ٢٨ مش ٢٥  يوم ما مصر قامت كلها يوم ما اعلن حظر التجول يوم ما اتقطعت شبكات الاتصالات  واذا اتكلمنا عن ٢٥ يناير انها كانت بداية الثوره  فانا احب اسميها ارهاصات او مخاض للثوره ابتدى من يوم ٦ ابريل ٢٠٠٨  واستمرت مع حركة كفايه وحركه ٦ ابريل اللى خدت التاريخ اسم لها  #٢٨_يناير  اليوم ده كان جمعه  وكنت متعوده وزوجى نتسوق من عروض المحلات الكبرى لنستفيد بفروق اسعار لما كانت عروضهم فيها فرق اسعار  رحنا سبينس اللى ف ستى استارز مدينه نصر  واحنا خارجين كانت الساعه ٢ ظهرا و كانت بعض الكافيهات مشغله قناة الجزيره وساعتها اتفرجنا حبه واحنا ماشيين على الناس اللى بيجروا والزحمه  والميدان   ولكن ابن حلال تطوع انه يقول انا جاى من وسط البلد دلوقتى ومفيش حاجه من دى  وان دى فيديوهات  قديمه متسجله  مش بث مباشر  النهارده زى ما الجزيره كاتبين  وبالتالى صدقنا وعليه كملنا شوبنج ورحنا  لكارفور الم...

#جمعة_الغضب_٢٨يناير٢٠١١(٢) #الليله٢٥٠ روحنا واتطمنا على اخويا اللى روح متأخر   واتطمنا على ولادى اللى بيلعبوا ع الكومبيوتر ومش دريانين بالدنيا  وابتدى اخويا يحكيلى اللى حصل  كان يومها ف شغله وعارفين ان مظاهرات النهارده اعلى من مظاهرات ال ٣ ايام اللى فاتوا اخويا كان من الناس اللى بيحلموا بالتغيير بس مليانيين باليأس من انه يحصل  علشان كده فاكر انها مش هتزيد عن وقفات النقابات  ويوم ما تعلى اوى هيحصل زى ما حصل ف المحلة ف ٦ ابريل ٢٠٠٨  بس صاحبه كلمه وقاله اللى بيحصل فيه حاجه غريبه ومختلفه عن كل اللى فات  وبدأ يحكيله من ساعة ما صلوا الجمعه ف جامع مصطفى محمود والمسيره اللى بعد كده من مصطفى محمود ف المهندسين واللى كان هدفها توصل لحد التحرير  وقوات الامن اللى قابلتهم على الكوبرى  وحصلت الصور والفيديوها اللى كلنا شفناها  بس الفرق ان صاحبه وهو بيكلمه كان بعد ما نزلوا من فوق الكوبرى والقنابل لسة مأثره على نفسهم كلهم  المهم انهم ف الشغل بتاعه روحوهم بدرى نظرا للاحداث  لما صاحبه رجع بعد كم الغاز اللى شمه وحكاله  فؤاد نزل التحرير كا...

#جمعة_الغضب_٢٨يناير٢٠١١(٣) #الليله٢٥١ طبعا ابتدت الاشاعات  البلطجيه عمالين يهاجموا كل مكان فى مصر  وناس اعرفهم مثلا  بتعيط وتحكيلى دول بيهاجموا بنك اسكندريه الفرع اللى جمبنا  طبعا معروف ان الفروع مفيش فيها فلوس فعادى يا جماعه اللى ياحاول يحاول وبعدين يعنى هو بنك ابونا واحنا مالنا للبنك نظام امنٌ يحميه    بس وفجأه الدنيا حوليك بتتحول لحالتين  رعب ف كل مكان من البلطجيه اللى بيهاجموا  وشباب خلاص احتل التحرير  والجزيره عماله تجيبهم وهم بيتدفوا على النار ويغنوا اغانى منير واحمد فؤاد نجم والشيخ امام  وبقى فى الميدان بيغنوا ف كل شارع ف بلادى صوت الحريه بتنادى  والحقيقه ف كل شارع ف بلادى الخوف من البلطجيه بيهاتى  و بالتالى شباب كل حى  خرجوا ف السقعه يقفوا يحرسوا الحى بتاعهم من العدو المجهول اللى بيهاجموا البيوت طب ياحبايبى ليه هيدخلوا الاحياء الشعبيه اللى الناس فيها بتكح تراب  والحرامى لو دخل بيوتنا  يصعب عليه حالنا  اكيد يعنى مش هيشيل التليفزيون اللى بيجيب الالوان بالشبه والاصوات بالعافيه ولا امبوبة البوتجاز  ...

#اكلة_ام_على #اصل_الحكايه #الليله٢٤٨ #الجزء_الثالث المماليك : ايبك فين ؟؟؟ شجر الدر : اصله يا حرام مات وهو نايم  المماليك : يعنى التعاوير والزرقان دا كله حصله و هو نايم يا شجر الدر  شجر الدر : اه اصله بيتقلب كتير  المماليك : بيتقلب كتير ...  يعنى مش مضروب لحد ما مات من للضرب  شجر الدر : توء .. توء ..  هو بيتقلب كتير   بس المماليك بتوعه مدخلش عليها اللعبه وعذبوا الخدم وحققوا معاهم لحد ما اعترفوالهم  بالحقيقه  وخافت شجر الدر وراحت تستخبى ف قصر تانى  من مماليك ايبك وعمايلهم  واتنادى ان البلاد بيحكمها السلطان الجديد هو الملك المنصور نور الدين على بن عز الدين ايبك  وعلفكره كان عنده ١٥ سنه مش زى ما كان اهبل ف الفيلم وهات الحصان بتاعى  بس بردو مش هينفع يحكم لانه كان بعيد عن القصر طول عمره  وكمان الفتره  دى كان فى صليبيين من الشمال ومغول من الشرق فكان سيف الدين قطز هو النائب بتاعه وهو الحاكم الفعلى للبلاد  ومع ان اى ام سلطان كل همها الحفاظ على العرش واللى ممكن تكون كمان بتستولى عليه لنفسها وتركن ابنها ...

#اصل_الحكايه #اكلة_ام_على #الليله٢٤٧ #الجزء_الثانى وكان لازم تتجوز زي ما شوفنا فيلم واسلاماه اللي ما كانش دقيق اوي في رواية اللي حصل حقيقي اتجوزت عز الدين ايبك ... وبعد الحيره بتاعة خطابك كتير وقالولى  اختارته ودى ميزه ومكانه قالت انه المفروض يعيش عمره كله يبوس ايدها عليها   ايبك كمان اللي ساب زوجته المصريه وابنه على  وراح عاش في القلعه عمل تضحيه كبيره و زي برده ما شفنا في الفيلم اختلفوا مين اللي يحكم هو كان الدنيا مقفله عليه  اه فى ناس رضيوا بس برضوا في مشاكل عماله تواجهه  وعدى ٧ سنين واستقر الحكم ف ايده وقضى على كتير من اعدائه من الايوبيين قرايب الملك الفقيد او المماليك الغيرانين وغيرهم  بس هو عدى ده كله وانتصر عليه  وشاف ان  شجر الدر تترزع بقى ف الحرملك وتبطل تنطيط فوق دماغه ف قاعة الحكم  لاء واللى زاد وغطى انها بتغير عليه وبتمنعه من انه يزور مراته وابنه على  اتغاظ منها وقال ف سِره  الكلمه  المشهوره ميكسرش ست الا ست زيها  سامعاك ياللى بتقولى اما هو قال ف سِره عرفتى منين يا فالحه  علفكره يعنى ايبك مكانش بيخبى ع...

#اصل_الحكايه #الليله٢٤٦ #اكلة_ام_على #سلسلة_حكاية_ورا_كل_اكله وزى ما اتعودنا ف الفتره الاخير بحب نحكى عن اصل بعض الاكلات وازاى ابتدت لحد ما وصلت لنا  اكله النهارده ...  اكله شتويه مغذيه  و عدوه للبرد  وكمان عدوه للرجيم  والاكله بردو اساسها عداوه   يمكن كتير مننا يعرف اصلها  ومن غير مقدمات طويله  نبدأ الحكايه  لما اتجوز الملك الافضل نجم الدين ايوب واللى كان لسه امير ساعتها   من جاريته شجر الدر  والجاريه كانت جميله و ذكيه ومخلصه لزوجها الامير  ودارت الايام اتسجن الامير بسبب المنافسه على الحكم ... واتسجنت معاه الزوجه المخلصه المحبه ف الوقت ده كانت انجبت له ولد وسموه خليل  بس خليل مات وهو عيل صغير   ودوام الحال من المحال  واتعدل الحال ورجع تانى لمصر واصبح الملك عليها  بس زى ما قلنا دوام الحال من المحال  البلاد هاجمها الصليبين من الشمال والحمله الصليبيه السابعه بقيادة لويس التاسع نزلت دمياط   والملك كان عامل حسابه ومجهز جنود كتير بس مكانوش مصريين او ممكن تقول القاده مكانوش مصريين  بس...

# اتنيل_جتك_نيله #جتك_٦٠نيله #الليله٢٤٥ طب ليه اتنيل ؟  وليه بنعتبرها دعوه ؟  طيب ايه اصل الموضوع ؟  الاصل اللى كنت اعرفه من بنك معلومات وامثال وتراث وحواديت الماضى .... الله يرحمها امى   والحكايه زى ما كانت بتقولها : ( ان زمان لما كان يبقى فى ميت غالى عند حد زوج مثلا فكانت زوجته او امه بتجيب النيله اللى هى الزهره الزرقا اللى كنا زمان بنحطها ع الهدوم البيضا قبل ظهور الغساله الاتوماتيك فى حياتنا  بتجيبها وتلحوس بيها وشها وشعرها والجزء اللى بيبان من الرقبه والنحر  وبكده بتكون متنيله على زوجها او ابنها او ابوها  طبعا دى كلها عادات جاهليه ومش عارفه ازاى فضلت موجوده لحد القرن بدايات  العشرين ومنتصفه  ولحد هنا خلصت حكاية الست الحاجه الله يرحمها ) بالتالى الناس لما تقول لحد اتنيل يبقى معناها انك ابكى على حالك عيش الحداد زى حداد الام الثكلى والارمه الحزينه والابنه اليتيمه  وزى ما هو واضح انه مالهوش علاقه خالص بنهر النيل او الذهاب اليه وزيارته  اما بقى سبب تسمية نهر النيل بهذا الاسم يرجع اشتقاق اسم نهر النيل إلى الكلمة اليونانية "نيلوس"...

#الحس_مسنى_و_ابات_مهنى #الليله٢٤٤  قصة مثل من امثال المصريين زمان  وجزء جديد من سلسلة ( حكايه ورا كل مثل ) حدوته جديده من حواديت امى القديمه  الله يرحمها  الحكايه النهارده صغننه لكنها مثل قديم بنحس واحنا بنقوله بالقناعه كده والرضا    كان ياما كان فى فارين اصحاب  واحد عايش ف دكان نجار  والتانى عايش ف دكان كبابجى  المهم كان بقالهم كتير متقابلوش  فلما اتقابلوا اللى عايش عند الكبابجى مكلظ كده  ومبألظ  والتانى ياعينى سفيف ومسفرت خالص ف الفار اللى عايش عند الكبابجى قاله مالك يابنى ضعفان ومسفرت كده انت مبتاكلش ولا ايه ؟؟ قاله : لاء باكل  بتاكل ايه ؟؟؟ دا سؤال فار الكبابجى   قاله فار ورشة النجار :  النجار  كل يوم يدهن المسن اللى بيسن عليه المنشار والازميل بتوعه ولما يمشى انا بخرج والحس نقطة الزيت دى والحمد لله على كده  اتخض الفار المكلبظ  وقاله : بقى بتسمى ده اكل  نقطة زيت تلحسها من ع المسن مسميها اكل   يا حرام  طب تعالى معايا يا اخى كل من عند الكبابجى اللى انا عايش ف دكانته  ...

#فاتت_جنبنا المره دى مش هحكى  الحكايه  هاسيبكم تسمعوها بلسان احد ابطالها  او هو البطل الوحيد ف الحدوته    فاتت جنبنا الاغنيه دى بحبها اوى  اساسا لما بسمعها بحس كأنى بتفرج على مسلسل مشوق ومستنيه الحلقه الجايه او فيلم تشويق من اللى بتأجل دخول الحمام او عمل الشاى لوقت الاعلانات 😉 الكلمات لحسين السيد والالحان محمد عبد الوهاب  وطبعا ملك الاحساس والرومانسيه والسهوكه عبد الحليم حافظ بتقول د. حامده بنت حسين السيد ان باباها كتب ف  الاغنيه ان بطلة القصه  هتكون معجبه بصاحب عبد الحليم  بس عبد الوهاب اقنعه انه يغير النهايه  بيقول عبد الوهاب ان ايامها عبد الحليم كان عنده جلطه ف رجله لكن كان مصمم انه يحضر البروفات بنفسه فاتعملت ف بيته وهو على كرسى  ورافع رجله على كرسى  لمده ساعه و١٠ دقايق بتعيش ف حاله حلوه بين  ترقب وتشويق وامل وفرح ودموع  وشويه ويعمل المفتش كورونبو علشان يعرف طريقها    لحد ما توصل للنهايه السعيده  وبعد ما خلصت شوية اللفلفه ف الاغنيه نوصل للنتيجه اللى اتعلمناها والفايده اللى لازم نستخلصها من الم...

#القرد_والتمساح #الليله٢٤٢ #الجزء_الثالث وقفنا عند ان التمساح قرر انه يضحى بصاحبه علشان التمساحة مراته قالت له علاجها انها تاكل من قلب قرد   نرجع للقرد ومعضلته ينط ف الميه ويغرق علشان ميستفادوش به ولا بلحمه  ولا يكمل معاه ويموت ضحية الصديق الخاين  بس دا قرد  ذكى يعنى  وعلشان كده قال للتمساح ان زعلان جدا على مرض زوجتك ويسعدنى بشدة  انى اساعدها على الشفاء  بس انا نسيت قلبى على الشجره  فممكن نرجع للشجره واجيب قلبى واقدمه لزوجتك هديه  صدق التمساح كلام القرد  ووصل القرد للشجره  وطلع بسرعه  والتمساح تحت مستنيه ينزله بالقلب  بس لقى القرد بينده عليه ويقوله :  انت متستاهلش صداقتى اذا مكانش بسبب خيانتك للصداقه ، يبقى علشان جهلك وغبائك انت مش عارف اننا شايلين قلوبنا جوه صدورنا  انا مش هديلك ثقتى ابداً   وكمان مش هديلك  فاكهه تانى  واكيد مش هتاخد قلبى  امشى من هنا واوعى تيجى تانى تحت شجرتى  ساعتها حس التمساح بالندم بعد ما خسر صديقه و خسر الفاكهه اللى بيحبها  اتعلم التمساح الدرس وعرف ان ال...

#القرد_والتمساح  #الليله٢٤٠ كان ياما كان   ف غابه بعيده .. بعيده  قرد عايش على شجره كانت ثمار الشجره لذيذه والقرد بيحبها اوى  كان ثمر الشجره دى نبات اسمه الجامبو  كان لذيذ وكتير  و القرد بيحبه اوى  بس القرد مكانش مبسوط  علشان كان عايش لوحده مالوش اصحاب ولا جيران  والمثل بيقول الجنه من غير ناس ما تنداس  بس الشجره كانت بتحميه من شمس الصيف ومن مطره  اصل الغابه اللى عايش فيها القرد المطر بيكون فيها ف الصيف مش زى عندنا المطر ف الشتا   و على فكر مطرة الشتا دى ف اماكن قليله ف العالم منها مصر لان اغلب العالم المطر فيه بيكون ف الصيف المهم وف يوم من الايام لقى تمساح جاى يتمسح ( بايخه بس معلش مقدرتش امسك نفسى من الالشه )  و يعوم من النهر اللى جنبه وووصل للشط وراح تحت ضل الشجره اللى فيها القرد  وريّح كده 🐊 ولما دارت عنيه لفوق لان التمساح مش بيعرف يرفع رقبته شاف القرد  سلم عليه وقاله ازيك يا قرد  رد القرد السلام  قاله ممكن اسألك على مكان الاقى فيه اكل ؟؟؟ انا مش لاقى حاجه اكلها من الصبح حتى النهر مفيش فيه سمك ...

#القرد_والتمساح #الليله٢٤١ #الجزء_الثانى طبعا اجارك الله لما يكون فى ست غرضها ف حاجه وجوزها مش موافق هتشغل الزن  والالحاح لحد ما يوافق  طب لو موافقش ... تشغل السهوكه ياستى دا صاحبى  دا بينا عيش وفاكهه ... بس تقول لمين ؟؟  واذا مجاش بالالحاح ... ولا بالسهوكه ... يبقى ييجى بالحيله  ...  وانا تعبانه يا زوجى العزيز وميعالجنيش الا قلب قرد وضحى بمراتك بقى يا تمساح يا خاين  علشان صاحبك   ودخلت التمساح المسكين فى جدليه اخلاقيه اضحى بصاحبى ولا بمراتى  وللاسف اختار يضحى بصاحبه  مع انه كان ممكن يفكر ف انه يجيب لها قرد تانى وميضحيش بصاحبه  القرد يتعوض او ميتعوضش بس ... الا ام العيال  وراح التمساح  على القرد وهو مقرر الغدر  وقاله : مراتى بتشكرك اوى على الفاكهه اللذيذه .... وعاوزه ترد لك الجميل وتعزمك عندنا ف البيت  فرح القرد بان بقى له اصدقاء وبيحبوه وبيعزموه وبيعزمهم وقرر انه ينزل من على شجرته ويقبل عزومة اصدقاؤه  بس فى مشكله ... هاوصل لبيتك ازاى يا تمساح وانا مش بعرف اعوم  قاله التمساح : متخافش انا هشيلك على ...

#حدوتة_ انا_صغيره حدوتة النهارده صغننه  وحاجه كده خفيفه  مالهاش   هدف محدد منها لكن دمها خفيف و الغريب انها مش شعر ولا زجل بس بتتحفظ بسهوله  انا لما بحكيها لجيل دلوقتى بعمل تعديل لتتوافق مع العصر ههههه هحط تعديلى للكلمه بين قوسين علشان تعرفوا النص الاصلى   انا صغيره👧 وعشتى (شقتى ) صغيره🏠 قعدت بكنسها  لقيت جنيه ...(100 جنيه ) 💸 جبت به لحمه🍖🍖 حطيتها ع الوابور (البوتجاز )🍙 جت القطه كلتها🐱  مسكت القطه ضربتها 🐈 جت صاحبة القطه خانقتنى😠 قولتلها تعالى نروح للقاضى👳 قولتله يا سيدى ياقاضى  قالى نعم يا ستى 💁 قولتله انا صغيره👧 ....  قالى خلقة ربكى 👐 قولتله وعشتى  (شقتى ) صغيره🏠 ...  قالى على قدكى قولتله قعدت بكنسها ...  قالى لنفسكى  قولتله لقيت جنيهة ... (100جنيه )💸 ...  قالى من رزقكى  قولتله جبت به لحمه ...  قالى من نفسكى قولتله حطيتها ع الوابور (البوتاجاز) ...  قالى ف محلكى قولتله جت القطه كلتها 😭😭😭 ...  قالى من خيبتكى 😡 قولتله يا قاضى القضيه يوه جتك زاظيه 😠 تسيب القطه الحراميه وتتشطر...

#حرب_الملوخيه #الليله٢٣٨ #اصل_الحكايه #الجزء_الثالث   ويدور الزمان وبعد ما اتخانقنا مع الهكسوس علشان مناكلهاش   وتخانقنا مع الحاكم بامر الله علشان ناكلها ينط لنا اليابانيين وييجى دكتور يابانى اسمه كوسوكى ايمورى ف جامعة تاكو شوكو و اسامى كده جايه  من كرتون كونان   الراجل ده كان جاى مصر يدرس اللغه العربيه  ولكن وقع ف غرام الملوخيه  حضرة الاستاذ توجومورى ده ولا كوسوكى ايمورى بعت منها لاهله ف اليابان. وبسلامته استاذ متخصص ف علم النبات  وبالتالى خد كام عود ملوخيه وبدل مايقطفهم وهو ساكت   ويقعد يخرطهم للمدام زى عبد المنعم  ابراهيم ف قصر الشوق وهى ترقصله زى ناديه لطفى وتغنيله بس قولوا لامى طب وانا مالى  لاء .. دا هو ومراته حللوها وعد معايا ياسيدى  **- ماده تقاوم الخلايا السرطانيه **-  جميع مركبات فيتامين ( ب ) ولقى فيها قيمه غذائيه عاليه جدا للطفل ونضارة البشره   يسكتوا  لاء  عملوا مؤسسة للملوخيه 😂😂 واستوردوا من مصر اطنان من الملوخيه ( ٤٥ طن ملوخيه ناشفه ) دا غير البذور اللى استوردوها وحللوا...

#حرب_الملوخيه #الليله٢٣٧ #الجزء_الثانى #اصل_الحكايه قولنا ان المعز لدين الله الفاطمى بعد ما داقها وعجبته وخففته قالك بس دى اكله ملوكى وسماها ملوكيه و عدت فتره وحكم مصر الحاكم بامر الله الفاطمى برده بس دا كان راجل لاسع  و مشاكله كتير ومن ضمن اللى عمل معاهم مشاكل كانت الملوخيه    فى بيقولوا من كتر غرامه بالملوكيه قالك دى اكله ملوكى مياكلهاش الا الملك وحاشيته  وحرم اكلها على المصريين واللى كان بيتقفش بياكلها كان بتضرب  وفى اللى بيقولوا انه كره الملوخيه من كتر كرهه لمعاويه بن ابى سفيان معروف ان المعز كان شيعى والشيعه بيكرهوا معاويه يمكن علشان قصة التحكيم وكده  المهم ان مادام معاويه بيحب الملوخيه يبقى يحارب معاويه ف صورة منع الملوخيه  زى ما بيقولوا انه حارب الجرجير ومنعه علشان امنا عائشه كانت بتحب تاكله  قلنا راجل لاسع وحكايته قصة حياته فيها من الغرابه والطرافه والسسبنس اللى يخلينى اخشى كتابتها لا يقولوا والست دى بتالف ف التاريخ لان مش ممكن يكون حد هلاهوبا كده  ونرجع تانى للملوخيه ورفض الحاكم بامر الله لان الشعب ياكلها  فبيقولوا من لذاذتها وا...

#اصل_الحكايه #الليله #حرب_الملوخيه  حلقة جديده من سلسلة اعرف بتاكل ايه وبما اننا امبارح اتكلمنا عن الرز وحكينا حكاية رز المرحومه  فقلت واحنا ف المطبخ نجيب اخته الحبيبه وصديقته الصدوقه ونتكلم النهارده عن الملوخيه  وزى ما اتكلمنا قبل كده عن الحواوشى  ودا الرابط بتاعه  https://ebtsam-elsawee.blogspot.com/2020/12/blog-post.html?m=1 والكريب  ودا الرابط بتاعه  https://ebtsam-elsawee.blogspot.com/2021/01/blog-post.html?m=1 الملوخيه تاخد حقها  طبعا الملوخيه اكله شعبيه مصريه  ياكلها الغنى وياكلها الفقير  الملوخيه كانت سبب ف مشاكل وحكايات عاشها المصريين عبر العصور  ومازالت حتى الان مصدر للخلافات والمشاكل تصل احيانا لصراعات ولا اللى بين الاهلاويه والزملكاويه و منها مثلا ياترى الملوخيه تتاكل بالرز ولا بالعيش وهاتك يا خناق  معاها بتشنجان مخلل ولا سلطه خضرة وعلشان نتفق الملوخيه موجوده ف مصر من ايام الفراعنه  ( زى اى حاجه ف مصر والعالم 😉) تلاقى اصلها الفراعنه لوجيكل يعنى  بس حكاية اصل الملوخيه ف مصر حكاية ظريفه  بيقولك يا سيدى...

#رز_المرحومه  #الليله٢٣٥ الحدوته دى من حواديت امى ويمكن دى كانت اول مره اتكلم على النت على حكايه من حكايات زمان  علشان كده بحبها بس اول مره احكيها هنا ف الصفحه كان ياما كان واحد مراته ماتت وبعد فتره اتجوز واحده تانيه  كانت ست بيت شاطره  ونَفسها ف الاكل لا يُعلى عليه  وجوزها كان معجب جدا بطبيخها  ويشكر جدا ف اى اكل بتعمله من حادق او حلو ...  الا الرز   كل ما تعمله رز يقولها : لاء ..  توء .. توء .. توء  مش زى رز المرحومه طب وهو رز المرحومه دا كان شكله ايه ؟؟ يقولها مش عارف ... بس كان بيبقى حلو كده وطِعم  فتانى يوم تغير  مره تعمله بشعريه  ولما يدوقه يقول لاء مش زى رز المرحومه  ومره تعمله حبه وحبه  وهو يرجع ويدوقه ويقولها توء توء مش ده  ومره تعمله اخضر ومره تعمله احمر  ومره اصفر  ومره ابيض  ومره بسمتى ومره بالخلطه   تصنف وتفنن وكل مره بطريقه احسن من التانيه وبردو مش زى رز المرحومه وميرضاش ياكله  فضلت على كده شهور  لما حملت وخلفت  وهو ع الحال ده وهى بردو كل يوم تعمل رز...