الف حكايه وحكايه مع ابتسام الصاوى

#انت_بتتنطط_زى_لمونة_الملوحه #الليله٣٧١ الحقونى انا بمتحن ... انا اللى خلصت تعليم من ٢٩ سنه بمتحن  انا اللى عايشه حياتى وباكل عيشى من امتحان الناس ومراظيتهم ..  لف الزمن ودار وبقيت ممتحنَه  اسمعوا حكايتى  من الاول : صديقه على الصفحه علقت ف الليله اللى فاتت وقالت : ((كانت والدتي رحمة الله تعالى عليها تكثر من استخدام الامثال الشعبيه في كلامها ، و كان الوالد رحمة الله تعالى عليه لها بالمرصاد كلما ذكرت مثل امامه قال له : هل تعرفي حكاية المثل ده ايه او اصل المثل ده ايه ؟ ههههه رب ارحمهما كما ربياني صغيرا ،  جزاك الله خيرا وبارك فيك ولك يا استاذة ابتسام)) فانا رديت ببرائه وحُسن نيه وقلت : ((اللى  فاكراه من الامثال دى قوليه نحكيه)) ...  غلطش انا  ؟  قولولى اه ... غلطتى وانسحبتى من لسانك زى عادتك والمفاجأه دا كان ردها  ((ذات مرة الوالدة قالت لاحد الصغار المشاغبين : اهدأ شوية انت ليه عامل زي ليمونة الملوحة ( الملوحة هي الفسيخ في الصعيد قديما ) ، المهم بابا الله يرحمه كالعادة ، كان يحب يناغشها ، قال لها : طيب عارفة ليه بيقولوا ليمونة الملوحة ؟...

#الفرق_ين_الفتح_العربي_والاحتلال_العثماني #الليله٢١ #الجزء_الثالث_والاخير بعد الخلافاء الراشدين كان الامويين ثم العباسيين  واحيانا بتستقل مصر عن بيت الخلافه زي ايام  بن طولون او الاخشيد بس يظل ولاء اسمي للبيت الخلافي لحد ما جه الاحتلال الفاطمي  ودا كان نوع غريب من الاحتلال  عارفين السم ف العسل  ضحكوا علي ذقوننا يحتفلوا بالاعياد ويوزعوا الهدايا والعطايا ويخرج الخليفه يحتفل مع الناس ف الشارع بعيد الفطر وعيد الغطاس  ويخترعوا القطايف والكحك وحلاوة المولد  ويسبوا الصحابه وزوجات الرسول وينسبوا تفسهم بالباطل للسيده فاطمه  عدت فترة حكمهم علي خير لان المصريين اتمسكوا بمذهبهم السني ضد الشيعه  زي ما اتمسكوا زمان بالمذهب اليعقوبي ضد المذهب  الملكاني بتاع الروم  وده لان للمصريين دماغ عِنديه ميتلعبش فيها لا بذوق ولا بعافيه 😅 وجه الايوبيين ووراهم المماليك  واخيرا #العثمانيين  العثمانيين جم مصر يحتلوها بس جم بجيوش مالهاش عدد حاربت الاول قنصوه الغوري ف مارج دابق  وانتصروا بسبب الامير المملوكي خاير بيك الليالعثمانيين كافؤه وخلوه اول و...

#تحت_القبه_شيخ_سيدى_الاربعين  #الليله٣٧٠ #الجزء_الثانى المصرى طول عمره مبتكر .. مخترع .. خلاق .. جينيّس  عنده لكل سؤال جواب ولكل مشكله الف حل وكله خارج الصندوق  والحكايه ان زمان كان فى بيت فى حاره من حوارى القاهره ضهر البيت ده كان قدامه خلا مش مداخل بيوت يعنى  ودا كان بيشجع اللى ماشى ومزنوق انه يفك زنقته خلف هذا الباب  اصل زمان كانت الناس مش مثقفه ومتعلمه زى الايام دى بالاضافه ان مكانش فى كبارى زى دلوقتى  المهم صاحب البيت زهق او بمعنى اصح كان بتخنق اول ما يدخل الغرفه اللى الناس بيصرفوا ف ضهرها  عنها وبعد ما غلب حلول  راح منضف المكان اللى ف ضهر بيته ده وكنس ورش وفرش رمل وجاب زرع  لاء  متفهموش غلط معملهوش جراج وكتب عليه اسم الحى وخلى الركنه فيه بالساعه  هو جاب رخامه فخيمه كده وكتب عليها مقام سيدى الاربعين  ودا مين بقى اللى يستجرى انه يبول على مقام ولى من الاوليا ؟؟ ومتفهمش بردو احدهم اخد باله  يمكن جار قديم مثلا وحضر اللعبه من الاول وبالتالى عارف الحكايه من طقطق لسلاموا عليكم  اللى بالمناسبه حكيت سبب المقوله دى قبل كده ...

#الفرق_بين_الفتح_العربي_والاحتلال_العثماني #الليله٢٠ #الجزء_الثاني   اللي حصل ان العرب عرضوا علي الرومان المحتلين لمصر اختيار من ٣ الاسلام  او الجزيه  او الحرب طب ما فيه حرب اهه اه بس دي الاختيار الثالث  طب والجزيه دي ايه ؟؟؟ دي مبلغ يدفع عن الفرد مساويه للزكاه التي يدفعها المسلمون ذكاة فطر وزكاة المال زي الضرايب اللي بتاخدها منك الدوله دلوقتي ومصلحتك اولاً وكده واللي يثبت انه مش هيقدر يدفعها بتدفع عنه من بيت مال المسلمين  واتقسم المصريين كالتالي :  في مصريبن اسلموا وعجبهم الاسلام فدخلوا فيه برضاهم وفي مصريين دفعوا الجزيه واتمسكوا بيدنهم ودول مسيحييّ مصر الان  وفي ناس جم مع دخول العرب لمصر عاوز تسميه غزو براحتك ... عاوز تسميه فتح مش هتفرق انا شخصيا بعتبره تحرير المصريين من غزو الرومان اللي بقوا روم.  بس  طب في ناس حاربت...  لاء  مصريين قاوموا دخول العرب...  محصلش ابدا ليه لانهم فرحوا باللي بيخلصوهم من حكم الرومان الظالم  وشويه ... شويه .... نتيجه للاختلاط اندمج العرب مع المصريين لدرجة انك متقرش تفرقهم عن بعض اتعلموا لغة بع...

#هو_انت_فاكر_تحت_القبه_شيخ #الليله٣٦٩  اصلهم فاكرين تحت القبه شيخ  هو انا قاعد على بنك  وامثله تانيه كتير بتوصل نفس المعنى ان انت فاكره يا هنا وياما هناك  طبعا فاكرينه قاعد على بنك دى سهله مش محتاجه لشرح ولا لها قصه هى مفسره نفسها  وفاكرين تحت القبه شيخ الناس بتقولها للى يظهر شئ وهو لا يمتلكه  القبه دا البناء اللى بيكون على شكل نصف كره وبيبنى فوق المساجد و الاضرحه والمقابر وغالبا بيكون صاحبها له مكانه دينيه او كرامات  و دا المفروض غالبا  بس احيانا بيكون فى قبة بس مش تحتها قبر ولى من اولياء الله الصالحين او شيخ من المشايخ  ازاى ..؟ الفكره  ان الناس طيبين وبيصدقوا اى حاجه لها علاقه بالدين ومش ممكن  يصدقوا ان ممكن حد يكذب على الله او يدعى حاجه مش حقيقيه لها علاقه بالدين وزى ما اتكلمنا الليله اللى فاتت عن حكاية دا احنا دافنينه سوا  وازاى ان الاخوين بعد ما مات حمارهم ودفنوه وعيطوا عليه الناس افتكروا ان دا مكان ولى من الاوليا ولا شيخ من المشايخ  والاخين استحلوا الموضوع وعملوا له مقام وله قبة وبدأوا يكتر زواره ومريديه اللى بيشهدو...

#الفرق_بين_الفتح_العربي_والاحتلال_العثماني #الليله١٦ #الجزء_الاول من مده عدي عليا خناقه كده علي الضيق ف جروب ما  واسباب الخناقه ان حد بيقول ان العثمانيين احتلونا ورد حد تاني قاله لاء دول دوله اسلاميه ودا مش احتلال  ناقص كمان تقول علي الفتح الاسلامي كمان احتلال ؟؟ رد الاولاني قاله عاوز الجد ... الفتح الاسلامي اه احتلال  الكلام استفذني قولت يا بت ياابتسام ادلي بدلوي  ماهو الدلو ده مش جايباه ف الجهاز اونطه ... لازماً  ادلو بدلوي فاللي حابب يفهم الموضوع بالراحه يجي معايا كده علي جنب  واللي مش عاوز يوسع كده علشان دلوي ميطرطش عليه اولا : تعريف الاحتلال ف اللغه  احتلَّ المستعمرُ بلدًا: اسْتولَى عليه  قَهْرًا احتلال اقتصاديّ: استيلاء دولة ما على موارد دولة أخرى بطريقة غير مشروعة، انتهي طب نمشي بالتدريج وواحده واحده  العرب دخلوا البلاد المحيطه او مايسمي بالفتح الاسلامي كان جنبهم من الشرق الفرس ودول تانيه تابعه لهم زى العراق ودى اكبرهم وكان دينهم المجوسيه، ودول اللي بيعبدوا الشمس من الاخر كانوا  كفار يعني وبالتالى الحرب عليهم ونشر الاسلام فى بلادف...

#داحنا_دافنينه_سوا #الليله٣٦٨ من اكتر المواضيع اللى بحب اتكلم فيها وافردت لها سلسله ف الحواديت هى اصول الامثال   هاحكي علي  مثل من اكتر الامثال اللي بحبها  ( داحنا دافنينه سوا ) دمه خفيف ومش عارفه ليه لما بتكلم عنه بفتكر مسلسل الوصايا السبع وسيد نفيسه  الحكايه ان زمان كان في اتنين اخوات شغالين تجار بيسافروا من بلد لبلد شايلين بضاعتهم الي ضهر حمار مسمينه ( ابو الصبر ) حاجه كده كانت منتشره زمان زى حُنين كده بتاع خفي حنين رابط قصته تحت 👇   كان الحمار اساسي في شغلهم وميستغنوش عنه  بس ف يوم وهم طالعين بالحمار تل الحمار عثر ووقع ومات  وساعتها الاخوين حسوا بالكارثه  طب هينقلوا بضاعتهم ازاي ؟؟ وهيسافروا من بلد لبلد علي ايه ؟؟ من حزنهم علي الحمار مرضيوش يسيبوه جيفه  كده ويمشوا  لكن حفروا و دفنوه وقعدوا عند قبره يبكوا اه يا ابو الصبر  اللي كنت بتعينا وتسهل علينا الصعب ياللى كنت بتنقلنا من مكان لمكان يا خسارتك يابو الصبر   يا اللى كنت بتجد الملهوف وبتوصل البعيد  كنت بتحل مشاكلنا وبتحمل وهموما واحمالنا  وقعدوا جنب القب...

،#اسكنا_انت_وزوجك_الجنه #الليله١٥ وَقُلْنَا يَا آدَمُ اسْكُنْ أَنتَ وَزَوْجُكَ الْجَنَّةَ وَكُلَا مِنْهَا رَغَدًا حَيْثُ شِئْتُمَا وَلَا تَقْرَبَا هَٰذِهِ الشَّجَرَةَ فَتَكُونَا مِنَ الظَّالِمِينَ (35) فَأَزَلَّهُمَا الشَّيْطَانُ عَنْهَا فَأَخْرَجَهُمَا مِمَّا كَانَا فِيهِ ۖ وَقُلْنَا اهْبِطُوا بَعْضُكُمْ لِبَعْضٍ عَدُوٌّ ۖ وَلَكُمْ فِي الْأَرْضِ مُسْتَقَرٌّ وَمَتَاعٌ إِلَىٰ حِينٍ (36) سورة البقره اولا السكن والسكون كان من ربنا لابونا وزوجه وبينهم هما الاتنين بس مكانوش محتاجين حاجه تانى ربنا بس هو اللى محتاجينه ليدوم سكونهم للجنه وسكونهم لبعض الشجره ماكنتش لها اى فايده الشجره كانت امتحان .. ربنا حطه لابونا ادم وزوجه علشان يعلمهم الطاعه .. مكانتش هتفيدهم بحاجه بالعكس دى ضرتهم وبعد ما كلوا منها بدت لهما سوءاتهما  (120) فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ ۚ وَعَصَىٰ آدَمُ رَبَّهُ فَغَوَىٰ (121)سورة طه قال الطبرى ف تفسيره ان سوءاتهما اللى هو العوره والشعراوى قال ان سوءاتهما هى العوره وعلشان كده هما عرفوا الفضلات اللى ب...

#شد_السكينه_ياهيثم #الليله٣٦٧ #قصة_تشويق_حدث_بالفعل #الجزء_الثالث_والاخير طبعا كلنا صوتنا باعلى صوت على اللى هيموت فرماً تحت عجلات قطار الملاهى فى مفارقه مبكيه او على الاقل هيتقلب من ارتفاع حوالى ٣ ادوار   وبسرعه لحق هيثم و شد السكينه ووقف القطر  والراجل الشملول-  بس متقوليش راجل - بينط بسرعه يرجع مكانه  وهو اقل  من اقل فانله   وربنا ستر ولحق نفسه ورجع قبل ما يحصل له دا ولا ده وبما ان اللعبه اشتغلت خلاص بقى  يبقى رجعوها ونزلونا  واحنا اسفين يا صلاح  او يا هيثم وتوبه من دى النوبه  بس قالوا مينفعش ترجع لورا هى بس تمشى لقدام  وبالتالى مفيش قدامنا الا اننا نصبر لحد ما جولتنا تكمل ومتخافوش وهى خلاص اتصلحت و الدنيا تمام  ومجبر اخاك  سكتنا وقعدنا طبعا بعد ما كل ركاب اللعبه فضلوا يزعقوا لفاندام  واهدى بقى وكنت هتموت نفسك وبقى شكله 😏 خالص  واعتقد ان البت لو طالت كانت رمته من جنبها  بعد ما لقته  بكل شهامه بيجرى ويسيبها على طريقه يكش تولع  ومشى قطر الموت الحقيقى مش لعب العيال اللى كنا بنصوت فيه بره...

#شد_السكينه_ياهيثم #الليله٣٦٦ #قصة_تشويق_حدث_بالفعل #الجزء_الثانى اتفقنا الليله اللى فاتت اننا دخلنا قطر الظلام ده استخسار على اساس اننا لفينا كل شبر ف الملاهى ولعبنا كل لعبه اكتر من مره  يبقى اشمعنى اللعبه الهايفه دى نسيبها  وبالتالى دخلنا وسيبنا محمدذو ال٤ سنوات وضحى ذات ال٣ شهور  عربيات ورا بعض كل عربيه فيها ٤ اماكن ٢ قدام و٢ ورا  اول عربيه قدام ... ركب شاب طول بعرض مفتول العضلات عامل فيها فاندام كده و معاه خطيبته ثم   ركبت انا واحمد ابنى اللى كان ٧ سنين وزوجى وورانا اخويا ومراته   وابتدت اللعبه تشتغل ... مكانش القطر مليان يعنى يمكن ٥ ازواج من الركاب تقريبا   يعنى منكملش كده ١٠ او ١١ شخص  وسمعنا اللعبه بتتحرك ولسه هتمشى وبعدين وقفت  فكرنا انها حاجه من خطوات اللعبه  بس سمعنا واحد بيقول شد السكينه يا هيثم وطبعا عرفنا ان دول ناس بيقطعوا بطيخ ورانا مالناش دعوه بيهم  بس اتكررت الجمله .. وبالتالى الموضوع مش محتاج لفكاكه انها سكينة الكهربا مش سكينة البطيخ  وسألنا المسئول اللى واقف عند البدايه في حاجه  قال لا خال...

#العصفوره_الخاينه #الليله١٤ كان ياما كان في عصفورتين بنوا عشهم اللي هيعيشوا فيه  و بدأوا يجمعوا الفول ويخزنوه ف العش بتاعهم  الكلام ده كان في الربيع علشان لما ييجي الشتا يلاقوا اكل مخزنينه كان الفول كتير فضلوا يجمعوا لحد ما اتملي العش  واطمنوا علي مستقبلهم ف الشتا  وباضت العصفوره بيضتين جُمال .... وفضلت راقده عليهم ف العش  كان العصفور هو اللي يخرج من العش يبجيب الاكل وهي ف مكانها علشان يفضل البيض دافي ويفقس ومبيقربوش من الفول اللي مخزنينه علشان ميخلصش وجه الصيف ...  والعصفور لاحظ حاجه غريبه العصفور لاحظ ان الفول اللي ف العش نقص جامد  دا بقي حوالي نص اللي ف العش  العصفور اتعصب واتهم العصفوره بالخيانه  وانها بتستني لما يخرج من العش وتاكل الفول...  مع  انهم متفقين ميقربوش له ويحافظوا عليه علشان  الشتا  وان هو مش مقصر وبيروح كل يوم يجبب اكل له وليها علشان يفضلوا بعيد عن اللي مخزنينه والعصفوره بكت وقالتله انها مكلتش منه وانها بتستناه ومبتاكلش الا معاه لما ييجي بس هو بردو...  مصدقهاش واتخانق معاها واتعصب وفضل ينقرها من دماغ...

#شد_السكينه_يا_هيثم #الليله٣٦٥ #قصة_تشويق_حدث_بالفعل اجازه بقى وفاضيين لا فى تلاميذ ولا حصص قوم قامت ف دماغنا نعمل رحله جماعيه لمدرسات المدرسه وبقالنا ف المشاورات اسبوعين  غيرنا فيها كل حاجه اكتر من مره  اتفقنا على مكان وغيرناه اتفقنا على مواعيد وغيرناها كتييييير  ونتفق ونختلف ونختلف ونختلف  بس مثابرين على الفكره وحريصين على تنفيذها خصوصا اننا بلغنا كتاكيتنا الصغيرين اللى اشتغلوا ف الزن وبالتالى بقى لا تراجع و لا استسلام  ومع الافكار والاماكن تداعت الذكريات  وافتكرت لما جت عينى فعينه .... يوووه مش وقته ... انا بتكلم عن الرحلات دلوقتى  افتكرت التالى .....  ف يوم من ايام الصيف الجميله خرجنا انا وزوجى وولادى اللى كانوا  صغيرين احمد ٧ سنين  ومحمد ٤ واخى وزوجته وطفلته حديثه الولاده ذات ال٣ شهور تقريبا  المهم نروح فين ؟؟؟ قلنا نروح الملاهى تعالوا نروح دريم لاند  كان يوم جميل لعبنا واتنططنا من لعبه للعبه  ولعبنا كل لعبه كذا مره  وكان محمد الصغير يا حرام اللى عنده  ٤ سنين و عند كل لعبه فى مقياس بالسنتيمتر ومحددين الحد ال...

#اول_القصيدة_كفر #الليله١٣ الحكايه ان #المعز_لدين_الله_الفاطمي دخل مصر بعد كل اللي كان بيتعمله من بناء مدينه القاهره والجامع الازهر والقصور والسور والبوابات  كل ده خلي لدخلته مصر بعد المده دي شئ مهيب  وله وقع وتأثير  ولان كل عصر له احمد موسي بتاعه و الاعلام الفاسد المنافق  علشان كده طلع شاعر المفترض انه شاعر كبير  اسمه #بن_هانئ_الأندلسي وسكعه قصيده القصد منها مدح الحاكم بس طبعا وسعت منه الله واساء فيها للحاكم قبل  ما يسئ لنفسه لان المفروض ان المعز كان رفض الكلام ده  لكن لا دا بالعكس عجبه جدا وطلب من ابن هانئ انه يصحبه ليكون معه في اقامته الدائمه في مصر  هي دي القصيده اللي اولها كفر :  ما شئت لا ماشاءت الأقدار                              فاحكم فأنت الواحد القهار فـكأنـمـا أنـت النبي محـمـد                                    وكأنـما أنصـارك الأنـصـار أنت الذي كانت تبشرنا بــــ...

#كتر_خير_اللى_افتكرنى #الليله٣٦٤ #الجزء_الرابع_والاخير  #محمود_المليجى_وعلويه_جميل نكمل مع محمود المليجى المرعب ف كل الافلام بس ميقدرش يمشى كلمه ع المرأه الحديديه الشهيره  بعلويه جميل واللى كانت بتتعامل معاه كأمه اكتر منها زوجته  لدرجة ان كان فى ناس وصحفيين كانوا فاكرينها اكبر منه ف السن  نرجع نكمل الحدوته   دريه احمد دمها خفيف وروشه كده هى من اصل بدوي وشخصيه متميزه ودا خلاها تدخل ف كذا مجال يعنى  مسرح  اذاعه  ودخلت على السينيما وبدات بادوار ثانويه  ثم بعدين بطوله ومع ممثلين كبار منهم كمال الشناوى و شكرى سرحان  وناس كتير   ووصلت بعد كده انها عملت سلسله افلام اسمها خضره خضره وكذا وحاجه نفس سكة اسماعيل يس  وهى كمان  فنانه شامله يعنى بالاضافه للتمثيل كان فى صوت حلو واتشهرت لحد لما جت لفرقة اسماعيل يس و اتعرف عليها ميييين ....  صح ... المليجى  و لقاها حاجه عكس المرأه الحديديه ويحبها محمود ويتجوزها   وتعرف علويه جميل وتخليه يطلقها وتخلى اسماعيل يس يطردها من الفرقه  مش عارفه فين مكتب العمل ولا نقابة...

#طالوت_ملكاً #الليله١٤ #الجزء_الثالث   ابتدت المعركه طبعا جالوت دا ضخم اللي حد مرعب وعنده من الجيش و الثقه والغرور ما يجعله يتحدي بكل ثقه  علشان كده وقف الصفين قصاد بعض كل جيش علي جبل  دا يعني لو تجاوزنا وقولنا ان ٣١٤ نفر دول يعتبروا جيش  ونادي جالوت وقال :  - انتوا اصلا عبيد عندنا  بس مين منكم اللي ييجي يحاربني ولو انتصر علينا اصبحنا عبيد عنده ولو انتصرت عليه اصبحتوا عبيد عندنا اللي هو بيسخر مننا ومن عددنا  طبعا الجيش سكتم بكتم محدش نطق حبيت اشجعهم احمسهم مفييييشششش...  دا جالوت لا المرعب يابا مش هزار  حبيت احمسهم واديهم دافع يشجعهم  وقلت اللي هيقتل جالوت هجوزه بنتي ويبقي قائد جندي ووريثي علي العرش  الكل بردو ساكت  بس استني كده في فجأه غلام صغير كده خرج من بين الصفوف وقال انا  مين الولد ده؟؟؟   حاولت افتكر...  وسألته : انت مين قاله انا ابن يسّي من سبط يهوذا اه افتكرته دا ولد كان موجود ساعة اختياري للجند واحنا لسه ف بيت المقدس  انا افتكرت كنت عامل اختبار صغير كده  كان معايا درع موسي عليه السلام وكن...

#كتر_خير_اللى_افتكرنى #الليله٣٦٣ #الجزء_الرابع #محمود_المليجى_وعلويه_جميل نكمل الحكايه ... انا بحكى حكايتهم مش علشان نجوم وفنانين وبلا بلا بلا  ولكن قصص حياة بشر بنتعلم منهم حاجه  زى حكايه سكر الله يرحمه او فاتيما او ابو وش احمر بشر عاديين ناخد من حياتهم عبره وعظه و  محمود المليجى اللى عليه تبريقه كانت بتخوف علبة  الفيشار اللى انت ماسكه ف ايدك ف السينما وانت بتتفرج عليه  هو خاف يقول للولا صدقى انه نفسه يتجوزها بس ف السر علشان المرأه الحديديه  اما بقى فتحيه الانصاري فدى  بنوته مصريه من اصل لبنانى شقيه اتعلق بيها مش ليدى زى لولا صدقى  ولا هانم زى علويه مراته  و علشان كده بيتجرا المرادى انه يصارحها بطلب الجواز  بس متجرأش انه يعلن كده قالها جواز ف السر وقابل اهلها واتفقوا ومع ان البنوته خايفه من سطوة مدام علويه بس هى كمان حبته دا المليجى بردو يعنى مش واد هلفوت  تقريبا ايامها كان لسه بشعر وهو سبتها بقى واقنعها متخافيش يا حياتى واحنا هنتجوز من غير ما هى تعرف  مين دى اللى متعرفش  انا وانتم اللى منعرفش  انما عند الاستاذه علوي...

#طالوت_ملكاً #الليله١١ #الجزء_الثاني فاكرين الجزء اللي فات خلص علي رفض بني اسرائيل اني اكون ملك عليهم مع اني من اختيار النبي اللي هم طلبوا منه يختارلهم  حاجه كده قمة التناقض  بس هوضح لكم هم معترضين عليا ليه  اصل النبوه طول عمرها ف سبط ... والملك ف سبط  (سبط يعني ذريه احد ابناء يعقوب الانثي عشر ) يعني احنا ١٢ سبط من الاثناشر ابن ليعقوب اللي هو اسمة اسرائيل  اذكر لكم منهم يوسف وبنيامين ولاوي و يهوذا و ...و .... يعني فاكرين يوسف واخوته اهم كل واحد من الابناء الاثني عشر دول بقي له ذريه كبيره اسمها سبط وانا من سبط بنيامين بالمناسبه  والسبط ده عمره ما كان منه نبوه او ملك  علشان كده بيعترضوا على اختيار النبي ليا  معترضين كمان علشان انا مش غني اوي او من علية القوم زيهم  بس انا سامع النبي بيقول : ان الله اصطفاه عليكم وزاده بسطة في العلم والجسم والله يؤتي ملكه من يشاء والله واسع عليم سبحان الله انا هاسيبهم وارجع بيتي  بلا وجع دماغ  سامع نبي الله بيحكيلهم عن ايه او علامه لو حصلت يبقي دا اختيار ربنا ليا  ايه ده؟؟؟  ايه اللي طاير وجاي ...

#كتر_خير_اللى_افتكرنى #الليله٣٦٢ #الجزء_الثانى  فتحت ف الامثال وانا لما بفتح حقيبة الذكريات مبتتقفلش  وخرجت من مثل لمثل  ومن مثل ياماجاب الغراب لامه اللى مر عليه سنه  لمثل كتر خير اللى افتكرنى ولو جاب شوية ترب وعفرنى  ووقفنا الليله اللى فاتت عند النوع التانى من الستات اللى تقول لجوزها ياما جاب الغراب لامه  و دى بقى بتكون الست  المستقويه اللى فارده عضلاتها بطريقه منفره عامله نفسها ند لجوزها ان مكانتش كمان مسترجله عنه كمان ودى لازم جوزها يستسلم لها لو عاوز يعيش ويربى عياله ويمكن كتر خيرها تسمحله يربى شنبه كمان  كنوع من الكرم الحاتمى ويعيش الزوج يجيب الحاجه ويتقاله ياما جاب الغراب لامه و ياكل عيش وهو ساكت  على طريقه ساميه رشدى اسكت انت متتكلمش زى فيلم غصن الزيتون  او سعاد احمد مرات حنفى وهتنزل المرادى   او علويه جميل هنزل صورهم تحت 👇للى ناسيهم  بالمناسبه علويه جميل الله يرحمها فلها حكايات وحكايات مع  محمود المليجى لدرجة انك تحس ان ادورارها ف السينما كانت مستقاه من حياتها الواقعيه  بداية اسمها الياصبات من طماى الزها...