الف حكايه وحكايه مع ابتسام الصاوى

#الامتحان_ج٢ #الليله٤٨٨ حكينا الليله اللى فاتت عن اليهودى اللى ربنا رزقه المال من وسع وهو وسع ع اللى حواليه فربنا خلاه يفضل غنى ف شبابه وف شيخوخته  والحدوته المره دى كان بطلها واحد من المسلمين مش يهودى  لاء ومش اى مسلمين دا كان من عهد النبوه ومش بس كده دا كمان كان بيتكلم مع الرسول وجهاً لوجه يا سعده يا هناه  مين الصحابى ده كان اسمه ثعلبة بن حاطب الأنصاري واحنا عارفين انصارى يعنى من اهل المدينه المنوره  ف يوم راح ثعلبه للرسول عليه الصلاه والسلام وقاله : يا رسول الله .. ادعى لى  ان ربنا يرزقني مال ف الرسول الله صلى الله عليه وسلم قاله : (ويحك يا ثعلبة؛ قليل تؤدى شكره خير من كثير لا تطيقه) يعنى احمد ربنا يا ثعلبه واشكر بنا علشان الحِمل لما يكون صغير هيكون سهل عليك تشكر ربنا عليه ... انما الكتير هيكون حِمل الشكر هيكون ثقيل عليك  يا ثعلبه عدى كام يوم الا وراح ثعلبه للرسول صلى الله عليه وسلم مره تانيه وقال : يا رسول الله ادعى الله أن يرزقني مال  تانى يا ثعلبه دا اللى بينصحك من لا ينطق عن الهوى هو شايف نفسك وميلها وعارف ان الفقر لك نعمه ورحمه  وتانى كان ...

#لاء_دا_من_رابع_المستحيلات  #الليله١٣٨ طب يا ترى ايه هم المستحيلات ال ٣ اللى المستحيل ده رابعهم : المستحيلات التلاته هم  الغول  والعنقاء  والخل الوفى  طب نفسرهم واحده واحده  ١ - الغول  العرب زمان ف شبه الجزيره كانوا بيخافوا من  الغول ويقال انه نوع من انواع الكائنات الشيطانيه ف الاساطير الاشوريه ودا كان قبل الاسلام  .... تمام طبعا فى ناس بتصدق ف وجوده وناس بتقول عليه مستحيل  مفيش حاجه اسمها كده  بعد الاسلام بقى فى  بعض الاحاديث للنبى صلى الله عليه وسلم  ذكرت الغول  منها  إِذا تَغَوَّلت لكم الغِيلان فبادروا بالأَذان وان كان بعض الرواه بيضعفوه لان سنده مقطوع ( يعنى احد الرواه قاله نقلاً عن فلان فى حين ان بينه وبين فلان ده مثلا ١٠٠ سنه ) والبعض بيقول ان طبعا ذكر الله حمايه من كل شئ  وبالتالى فالرسول لم ينكر وجود الغول  وفى  كذا حديث لبعض صحابه بيقولوا انهم واجهوا غيلان او جن و كانت بتسرق منهم مثلا  وكانت بتقولهم  لما يسألوها عن ازاى يحموا نفسهم منها فتقول  بتلاوة اية الكرسى ولما حكوا للر...

#الامتحان #الليله٤٨٧ الابتلاء ... المحنه ...  انا عاوزه ابتلاء سيدنا سليمان ... مش ابتلاء سيدنا ايوب يارب كلنا لازم نمر بالابتلاء حتى الانبياء  سيدنا رسول الله صل الله عليه وسلم مر بابتلائات كتير من اول فقد ابناؤه كلهم - الا ستنا فاطمه - على حياته ودفنهم بايده وبكاهم بعينه وقلبه  اوذى من قريش كفارها ويهودها ومسلمش حتى من عمه وزوجة عمه  وحادث الطائف وغزوة احد ...  وغير ... وغيره بس دايما كان بيأثر فيا ابتلاء سيدنا ايوب ...فقد كل ابناؤه  و افتقر مرض جدا واتعرض للطرد بسبب مرضه من بلده  واضطرت مراته تعمل ف البيوت علشان تلاقى لقمتهم هما الاتنين  كنت دايما بحس ان ابتلاؤه يصعب على اى حد إحتماله الا لو كان نبى  اما سيدنا سليمان يا زيدى يا زيدى ...اهه ده اللى انا عاوزه ابتلائى منه يا رب  ملك لم ولن يحصل عليه احد مثله  خدم من الجن  طيور وحيوانات وكلام عن خاتم وبساط سحرى وقوارير  دا حتى النمله مش بس بيسمع دبتها لاء دا بيسمع كلامها وحوارتها  خيول بيستمتع بتريضها  ميه بتغير طبيعتها ويقدر هو وضيوفه يمشوا عليها  وكله كوم و...

#جلد_الحمار_ج٤_والاخيره #الليله١٣٧ بما انها حدوته يبقى لازم سكتها متبقاش سالكه  يعنى ليه مايروحش يقول لامه انه عاوز اتجوز البنت اللى ساكنه ف الغابه واستايل لبسها funky بتحب تلبس جلد الحمار  لون النجوم و الزمن  وبتروش على نفسها باستايل جلد الحمار  ويبقى كل مشكلته ان اللى بيحبها بتلبس جلد الحمار وانتى يا ماما بتلبسى فرو التعلب والدب وكلهم حيوانات عاتشى يعنى    لاء دا يلف ويدور ويقول عاوز فطيره من اللى بتعملها البنت اللى ف الغابه وده  اللى وقفنا عنده امبارح ونكمل بقى ... البنت وهى  بتعمل عجينه الفطيره وقع منها الخاتم بتاعها في قلب العجين    ساعتها اول ما جاء الامير ياكل لقى الخاتم  وطبعا المفروض يقرف ويقول ايه القرف ده ويرمى الفطيره  او يحطه ف جيبه من سكات دا لو كان خاتم غالى وقيم والامير ايده طويله يعنى  ويبقى حتى الخواتم بتغير شغلانتها وبدل ما بتطلع ف بطن السمك بقت تطلع ف الفطير واحنا اللى مش عارفين نعمل شفت كارير زى الخواتم  المهم نرجع للامير  الامير اول ما شاف الخاتم عرف على طول ان ده بتاع البنت اللي من الغابه ع...

#ليست_السعادة_فى_المال٣ #الليله٤٨٦ وقفت قصة كرستينا فى بحثها عن السعادة  عند سن ال٣٧  ولما لقت ان مفيش حاجه من اللى عاشت تعملها حققت لها السعاده قررت انها تنهى هذه الحياه البائسه  كده الثروه اتنقلت من الجد  للام للحفيده  بس قبل ما تموت اثينا كانت انفصلت عن تيري روسيل   واخدت بنتها تحاول تعوضها او تعوض معاها اللى اتحرمت منه لما امها وابوها كانوا بعاد عنها ف طفولتها  ومع ان اثينا كانت طفولتها كانت متدلعه بردو دى كانت عايشه ف  فيلا ١٨ اوضه  الليفينج فيه بيسين  فيلا فيها  جنينة حيوانات ومدرب حيوانات و على مساحة ٣ فدان  وف اوضة نوم اثينا دواليب للعب  ومش اى لعب دى نماذج مصغرة من عرايس لابسين من كريستيان ديور زى ما ابله فاهيتا لابسه من عند هانى البحيرى  امها كانت جايبه لها عربيه فيراري لعبة ب ١٠،٠٠٠ دولار اميركي  وعلشان بتحب اغنيه الخروف الاسود جابت لها قطيعا من الخرافان الصغيرة في البيت وكان اهم من ده كله موفره لها الحب اللى اتحرمت منه هى في طفولتها بس رجعت بانتحارها والبنت عندها ٣ سنين حرمتها من اهم حاجه ... منه...

#جلد_الحمار_ج٣ #الليله١٣٦ تصدقوا دبح الحمار  الملك ده يا اما اتجنن ياما الدهب كان بيبقى رييييحته وييييحشه ف قرر يستغنى عن خدمات الحمار الجليله  بس بردو دا بيدل على الاصرار الغريب اللى عند الملك انه يتجوزها  والبنت ومعاها الجنيه فرغت حيلتهم ومفيش طلبات تعجيزيه  تانيه اكتر من كده ممكن يطلبوها من الملك  علشان كده الجنيه بتاعتها  قالتلها ما ينفعش تبقى هنا  اكثر من كده  دا دبح  الحمار🦓 ابو كيكى💩 دهب🪙  انت لازم تهربي استخبي تحت جلد الحمار السحري ومحدش هياخذ باله منك و انت بتهربي  وانا المكان اللي هتوصلى له وتفضلي فيه هاجي لك فيه اجيب لك كل جواهرك ولبسك و حاجاتك وفعلا لما جاء الليل البنت هربت مستخبيه في جلد الحمار السحرى اللى مخلاش حد يشوفها وهى بتهرب من القصر  فضلت فتره كبيره اوي تبعد وتمشي لحد ما وصلت ل مملكه بعيده وهناك مكنش قدمها الا انها تدور على شغل تعيش منه بس كان لازم تفضل مستخبيه ف جلد الحمار لان دى هى كمالة التعويذه بتاعت الجنيه  دورت كتير بس محدش كان راضى بيها بسبب شكلها وهى لابسه جلد الحمار اللى كان يخوف اى حد بقرب...

#ليست_السعادة_فى_المال٢ #الليله٤٨٥ اتكلمنا الليله اللى فاتت عن الكسندر اوناسيس واللى موته ف عز شبابه كسر قلب ابوه  بس لما نشوف اخته كرستينا ف نلاقى ان حياتها كانت الحياه اللى تتمنى اى بنت فى الدنيا انها تعيشها   بداية من طفولتها هى واخوها كان ابوها وامها بيغرقوهم باغلى واحدث الالعاب  اللى حلم كل طفل انه يكون عنده منها واحده بس مكانتش بتحقق السعاده ولا بتعوضها عن حرمانها عن ابوها وامها  اللى مشغولين عنها بسفرهم من بلد لبلد  خصوصا لما انشغل بخيانته لها وانشغلت امها بتعويض النقص ده بعلاقات وبرحلات زودت  انشغالها عن ولادها  وترجع لولادها محمله لعب وهدايا  وتكبر البنوته وتوصل لسن ال١٦  ويحاول ابوها انها تلاقى السعاده وسط اصحابها اللى بيصرف عليهم ٣٠ الف دولار شهريا علشان يكونوا حوليها ويسعدوها   وكانت بتبعت الطيارات الخاصه تجيب لها الاكل والمشروبات من امريكا لاى مكان ف العالم  مثلا ف مره كانت ف النمسا و نسيت هناك شريط الكاسيت بتاع مطربها المفضل ديفيد بوبى     تزعل ...لاء تضايق ... لاءا تعمل ايه ؟؟؟ لاء بردو مش تضحك  ول...

#جلد_الحمار_ج٢ #الليله١٣٥ الملك نده للبنت وعرض عليها الزواج والبنت اتخضت😳 وقالتله ادينى مهله افكر طبعا هى لا هتفكر ولا حاجه هى عاوزه فرصه تفكر فيها ازاى تتهرب منه وهربت ع الغابه عند بيتها القديم اللى ف الغابه وهناك كانت الجنيه اللى بتحميها وتساعدها  وقالت لها : ساعدينى اعمل ايه ؟؟؟ الجنيه قالت لها قوليلوا عاوزه فستان لون الزمن  وراحت له وقالت طلبها   وبعت ناس ف  كل مكان وف الاخر جابولها فستان زى طلبها اللى وصفته  واحتارت والجنيه قالت لها اطلبى فستان لون القمر  وجاب لها الفستان وكان جميل و روعه  بس البنت مش موافقه تعمل ايه ؟؟   وساعتها سألت جنيتها وقالت لها  اطلبى منه فستان لون الشمس  وجاب الفستان اللى طلبته  وطبعا كده البنت مش هتفضل تطلب منه ظواهر الطبيعه اكتر  يعنى فاضل كمان تقوله عاوزه فستان زى مجرة درب التبانه ولا فستان ف حرارة بركان فيزوف  والملك ده شكله مربط مع امازون والديب ويب وبيجيب لها كل اللى بتطلبه  علشان كده البنت طلبت منه احسن واغلى  حاجه عنده  طلبت جلد  الحمار اللى بيتفضل بفضلاته عليهم وب...

#ليست_السعادة_فى_المال #الليله٤٨٤ علشان تصدقوا ان ليست السعادة ف المال  تعالوا نتعمق شويه ف حكاية اوناسيس و يلا نسمع حكايتة  احنا حكينا ازاى ان اوناسيس خلاص اصبح اغنى اغنياء العالم  قطب الصناعه والتجاره والصيد البحرى ونقل البترول وزوج جاكى  اشهر امرأة ف العالم ف الوقت ده  ابنه مسك شركة الطيران وطبعا شاب ومقضيها سفر وطيران  واذ فجأة يحصل حادث طياره يموت الولد وهو ٢٤ سنه وبيجهز اوناسيس انه يورث كل الامبراطوريه مترامبة الاطراف مازال موت الكسندر الغامض بيدعو للتساؤل وهو دى حادثه طبيعيه ولا مدبره  وسبحان الله الحكايه دى اتكررت ف كذا بلد حول العالم فى الهند وسوريا ومسيرنا نحكى عندهم ابن انديرا غاندى وابن حافظ الاسد  حيث يكون الولد اللى بيكرس انه هيورث كل حاجه مكان ابوه ويخطفة الموت ف عز شبابه ويبقى الولد البعيد او اللعبى او دكتور العيون هو اللى يشيل الليله فاكرين  ((وَلَقَدْ فَتَنَّا سُلَيْمَانَ وَأَلْقَيْنَا عَلَىٰ كُرْسِيِّهِ جَسَدًا ثُمَّ أَنَابَ))سورة ص (34) ولكن لهذا حكايه اخرى   ودا ياخدنا للرجل اللى عارف كويس ان كل سعادته ف الدنيا ...

#ليست_السعادة_فى_المال #الليله٤٨٤ علشان تصدقوا ان ليست السعادة ف المال  تعالوا نتعمق شويه ف حكاية اوناسيس و يلا نسمع حكايتة  احنا حكينا ازاى ان اوناسيس خلاص اصبح اغنى اغنياء العالم  قطب الصناعه والتجاره والصيد البحرى ونقل البترول وزوج جاكى  اشهر امرأة ف العالم ف الوقت ده  ابنه مسك شركة الطيران وطبعا شاب ومقضيها سفر وطيران  واذ فجأة يحصل حادث طياره يموت الولد وهو ٢٤ سنه وبيجهز اوناسيس انه يورث كل الامبراطوريه مترامبة الاطراف مازال موت الكسندر الغامض بيدعو للتساؤل وهو دى حادثه طبيعيه ولا مدبره  وسبحان الله الحكايه دى اتكررت ف كذا بلد حول العالم فى الهند وسوريا ومسيرنا نحكى عندهم ابن انديرا غاندى وابن حافظ الاسد  حيث يكون الولد اللى بيكرس انه هيورث كل حاجه مكان ابوه ويخطفة الموت ف عز شبابه ويبقى الولد البعيد او اللعبى او دكتور العيون هو اللى يشيل الليله فاكرين  ((وَلَقَدْ فَتَنَّا سُلَيْمَانَ وَأَلْقَيْنَا عَلَىٰ كُرْسِيِّهِ جَسَدًا ثُمَّ أَنَابَ))سورة ص (34) ولكن لهذا حكايه اخرى   ودا ياخدنا للرجل اللى عارف كويس ان كل سعادته ف الدنيا ...

#عظامى_ولاعصامى٧ #الليله٤٨٣ #الحكايه٤_ج٢ انا اخسر؟؟ لاء دا انا .... ايه دا هو انا مقولتش باقى اسمى ايه؟ انا ارسطو اوناسس لو سمعت اسمى قبل كده يبقى عارف انا مين كويس  اما لو مسمعتش اسمى قبل كده يبقى روح دور على معلومات تانيه عنى غير اللى بتقولها ابتسام لانها بتختصر اوى  انا زعلان منها على انها شِبه بتكروتنى  بس عازرها اصل القراء عندها خلقهم ضيق و هى بتخاف تقع ف فخ الاسهاب فتبقى ممله  نرجع لشركة صيد الحيتان اللى افترض العالم كله انى خسرت بسبب الاعتراضات العالميه على صيدهم  بس الحقيقه انا كسبت   لانى بعتها لشركه يابانية ب ٨.٥ مليون دولار اسكت ؟؟ لاء اشتريت شركة الطيران اليونانية اللى بتخسر  وحولتها لشركة خاصة ناجحة وتحقق أرباح  واتنقلت لمدينة نيويورك في أمريكا وهناك  بنيت إمبراطوريات و شركات  ودلوقتى بقيت صاحب اكبر شركات التبغ وتجارة وتصنيع السفن دا غير شركة صيد الحيتان وشركة الطيران  اسكت ؟؟  لاء البترول  البترول بقى من اكبر واهم مصادر الوقود ف العالم ومع التطور الصناعى وانتشار الصناعه ف العالم كله بقى البترول عصب الاقت...

#حرب_البسوس_ج٥_والاخير #الليله١٣٣ وزى ما حكينا النهايه اللى ذكرت عن موت عدى المهلهل الزير سالم ودا اسمه لوحده  هنقول القصه التانيه لموته واللى لا تقل عنها شجن وميلودراميه  #القصه_التانيه_لموت_الزير_سالم ان هو زهق وملّ فاقترح عليه الجرو  ابن اخوه انه يخرج للتنزه  ايوه .. انت قرأت صح ابن اخوه كان اسمه الجرو طب مش يعملوا حسابهم انه هيكبر وهيبقى راجل فيقولوا الكلب علطول  خصوصا وان ابوه كليب  متفهمش ناس معندهاش بعد نظر وعلفكره الجرو كان فارس وبطل و شاعر مفوّه  وبمناسبة اسم الجرو (  هجرس ابن الجليله وكليب معنى اسمه  ذئب او قرد)  المهم الجرو لقى عمه زهقان مش يشتركله ف نتفلكس ويروح عنه  او ياخده اسبوع  تركيا ولا اسبانيا ولا حتى شرم او   مارينا لاء دا كل اللى قدر عليه انه ركبه هودج حط معاه كل ما يحتاجه  وبعت معاه عبدين ف خدمته  يفسحه فى الصحراء هو دا اللى قدر عليه 😏 العبدين  بعدوا شويه عن مضارب القبيله  الا و العبدين تعبوا وزهقوا  واتفقوا يقتلوه ويدفنوه مكانهم  وهو يعنى اهله هيبعتوا المعمل الجنائ...

#عظامى_ولاعصامى٧ #الليله٤٨٢ #الحكايه٤ اعرفكم على نفسى  ارسطو مش الفيلسوف اليونانى  انا يونانى بردو بس اتسميت على اسمه  عاوزين تعرفوا ليه ؟ هاقولكم ... أبويا سقراط و امى بينلوبي عرفتوا ليه اسمى ارسطو ابويا كان بيالش باسمى  بس انا بحب اسمى وبحب ابويا  و اكيد احنا يونانيين بقى فعادى يعنى ان  سقراط يخلف ارسطو تعالوا نكمل ... انا اتولدت في كارتاس وكان جدى قسيسا و بيتمنى إني انا حفيده اكون قسيس ارثوذكسيا  ابويا بقى رجل أعمال ناجح في الشحن و التبغ  و كان بيعلمنا فى مدارس غاليه لما اتخرجت من المدرسة  كنت بتكلم ٤ لغات بس بسبب الحرب العالمية الأولى فقدت أسرتى اغلب ثروتها   مش بس كده احنا كمان بقين لاجئين و هربنا لليونان بعد الحريق الكبير لازمير في سنه١٩٢٢ و اللى اتسبب ف موت زوجة ابويا واختى وعمتى و٣ اعمام كلهم ماتوا فى حريق كنيسة ثياتيرا اللى كانوا مستخبيين من الحريق الكبير في ازمير الحرب خسرتنا فلوسنا  والحريق خسرنا احبابنا  و خلاص ملناش حاجه ف ازمير ولا لنا حد ف اليونان ولا حتى معانا فلوس وكمان فقدنا كتير من الاهل  كان لازم أ...

#حرب_البسوس_ج٤ #الليله١٣٢ مرور ٤٠ سنه حروب خلت الزير سالم عجز  بس يا ترى ... ايده ضعفت  ؟؟   عزيمته قلت ؟؟ ابدا 😏 راجل جِدر انا مش بقرّ عليه  انا بحسده وش بس الناس هى اللى اتفضت من حواليه اما بإنهم تركوه لما عانوه من ويلات الحرب دى  او بان اللى بيشجعوه ويشجعهم ماتوا او بسبب  السن هم كمان عجزوا  القبائل فرهدت من الاخر  المهم القبائل اتفقت ع الصلح  خصوصا ان الزير سالم ف المجمل كان هو اللى غالب بنى بكر  بس الزير سالم مكانش راضى وراح شعللها ف حته تانيه  لكن  الناس مكنش فيهم حيل يكملوا ... ما قلنا فرهدوا .. فطنشوه  وانتهت الحروب على كده  خصوصا لما جساس مات  و اللى قتله هو الهجرس بن كليب  اه ابن الجليله اخته  وبكده يبقى قتل خاله علشان يأخذ ثأر ابوه واطى ... انا بقول انه واطى  ولا جدع ... انا بقول انه جدع اصل اصلا جساس ده هو اللى واطى وهو اللى بدأ وكمان حركة انه يمنع عن كليب الميه وهو بيموت حركه مش تمام مش من شهامة العرب يعنى ... نرجع للمهلهل او الزير اللى اسمه الاصلى عدىّ  بس كان غاوى يتسمى با...

#عصامى_ولا_عظامى٥ #الليله٤٨١ #الحكايه_الثالثه٢ بناء البيوت مش هو شغفى دلوقت   اصلى غيرت نشاطى خطرت ف بالى فكره جديده  هو انا ليه مبنيش فنادق متوسطة تستهدف متوسطى الدخل  بتوفر غرف فندقيه جيدة و بسعر منخفض يعنى ليه الابهار والفنادق ال٥ نجوم وال٧ نجوم  ايه المشكله لما اعمل حاجه نضيفه ومريحه وغير مكلفه وقد كان وكسبت وبقت الفنادق بتاعتى بتجذب النزلاء لنضافتها وخدمتها اصل ممكن تقولوا عليها كويسه ورخيصه وبنت ناس    بس ايه ده ؟ رجال الأعمال انجذبوا اوى للاقامه ف الفنادق بتاعتى  اصلك ممكن تطلق على الفنادق بتاعتى ما انا قولتلكم كويسه ورخيصه وبنت ناس😂 و علشان الفئه الجديده اللى انجذبت ليا من غير ما استهدفها باعلانات بالملايين  انا بقى هاحط الملايين دى ف تطوير الفنادق عندى ... ازاى ؟ تعالى اقولك ...    كل الحكايه انا شوفتهم محتاجين ايه ووفرته بدون مصاريف اضافيه  يعنى ايه ؟ اقولك ...  كمبيوتر ... حاضر  طابعات ...يتوجد يا فندم يتوجد    فاكس ... نشترى يا فندم نشترى  ونجهز فنادقنا بكل اللى محتاجينه ومن غير ما نزود ف ا...

#حرب_البسوس_ج٣ #الليله١٣١ ها تفتكروا ايه ؟؟؟ جاب  ميه ولا حواوشى !!!! ولا جاب اجله !!!! اكيد طبعا جاب اجله مش عاوزه كلام امال يعنى الحرب تقوم ازاى ؟؟؟ اذ فجأةً .. استوعب جساس اللى عمله  دا قتل الملك ومش اى ملك دا الملك كليب قاتل التبع حسان اليمانى  قتل ابن عمه  قتل جوز اخته الجليله  وابو عيالها  الجساس جري  على اهله وعمل عيل  وماما ..ماما ..الحقينى يا ماما .. خبينى يا ماما الحقنى يا بابا  قاموا خدوه وهربوه بعيد بس طبعا اصحاب الواجب جريوا على الزير سالم   اللى ف الوقت ده كان قاعد مع صاحبه ونديمه  همام ابن عمه زميله فى الفسق والعربده والهلس والزندقه  مين  همام صاحبه  ده ؟؟؟  اخو  جساس شوف الصدف يا جدع بصوت عادل امام  جاله الخبر سكت متكلمش و راح الزير سالم خد اخوه ودفنه  وخد عزاه وفضل يقول شعر رثاء فى كليب مده طويله  منه شعر قاله : كُليب لا خير في الدنيا وما فيها  .:.  إن أنت خلَّيتها فيمن يُخليها لما الناس قالوا  اه دا سالم ده توتى فروتى وراجل بيلبس الحرير  يكتب شعر عن ا...

#عصامى_ولا_عظامى٥ #الليله٤٨٠ #الحكايه_الثالثه تعالوا عندى اتعرفوا عليا وانا عازمكم عندى ف بلدى امريكا بس الاول اعرفكم بنفسى انا  والاس جونسون طلعت ف الدنيا لقيت نفسى عامل بسيط في ورشة خشب معرفتش غيرها شغلانه  الحمد لله دخلى كان مش بطال اه محوشتش ثروه للتقاعد زى اغلب الامريكان ما بيعملوا  بس انا عملت حاجه احسن من وجهة نظرى  انا اتملكت بيت  ودا شئ لو تعرفون عظيم عندنا ف امريكا  اصل البيوت اغلبها ايجار واللى يملك بيته و كمان سدد اقساطة دا بيعتبر نفسه ملك زمانه  انا دلوقتى ف اربعينات من عمرى بحلم انى احوش علشان جامعة ولادى  انتم عارفين بردو اد ايه الجامعات عندنا غاليه اوى بس اعمل ايه واللى جاى على اد اللى رايح  احلام كتير بس مش وقتها انا لسه ف عز شبابى ولسه المستقبل شايل ليا كتير  وف يوم فجأه كده  انهارت كل احلامى جدال صغير زى اللى بيحصل كل يوم الف مره بين العمال ف الشغل  بس اتفاجأت بالمدير بيطردنى  من الورشه  خلاص قرار نهائى فجأه كده 😢 طب ازاى ؟ واعيش منين انا وولادى ؟ اجيب منين ؟ وناكل ويتعلموا ازاى ؟ انت عارف حسيت باي...

#حرب_البسوس_ج٢ #الليله١٣٠ وقفنا لما كليب عرف ان حبيبته هيتجوزها عدوه التبع  يسكت ... اه سكت بس عمل زى فكرة #حصان_طرواده   استخبى هو وشوية شباب صحابه فى الصناديق اللى واخده جهاز العروسه لبيت عريسها واستنى لما الليل جه والناس ناموا  وراحوا طالعين وقتلوا التبع وخطفوا العروسه ورجع بيها على قيبلته  وبعد فتره اتجوزها  و مشيت الدنيا وعاش معاها  وخلف منها كمان  فى الوقت ده مين اللى متغاظ اخوها جساس  جساس ده كان مش بس متغاظ من كليب علشان خطف اخته واتجوزها بالطريقه دى  ولكن كمان لان عم كليب   زى ما قولنا قبل كده حِمش ومتحكم  يعنى موارد المياه ( الابار ) بتاعة قبيلته  محدش يشرب منها الا باذنه  شويه ... شويه يبنى سد النهضه و يغيظهم ع الفيس بوك طب يا ابتسام ... عماله من الصبح تقولى حرب البسوس .. حرب البسوس ... فين البسوس  دى  الصبر بس ... البسوس دى تبقى خالة جساس  اسمها البسوس بنت منقذ التميمى كانت جايه تزور اختها طلعت من الضيوف الرزله اللى تقعد تلزق مش تاخد شايها وتروح  وعلى رأى المثل  والضيف المجنون...

#عصامى_ولاعظامى٤ #الليله٤٧٩ #الحكايه_الثانيه اسمحولى احكيلكم حكايتى  انا إنزو واتولدت ف يوم مطلعتلوش شمس ودى حقيقه😊  لان الثلج فضل مغطى بلدنا و حابس ابويا و مانعه من انه يخرج يسجلنى لمدة يومين   فى الفترة من سن الـ١٠  لسن لـ١٩  كان كل اللى بعمله وبيشغل تفكيرى هو سيارات السباق  وكان حلمى هو ازاي اكون سائق سباقات؟ وانا عندى ١٩ سنه  دخلت الجيش الايطالى ف عز  الحرب العالمية الأولى وجالى وباء الأنفلونزا  و سرحونى من الجيش عموما انا خفيت وحظى ف دا كان احسن من حظ ابويا واخويا اللى ماتوا بيها  ابويا واخويا كانوا قدوتى كانوا بيشتغلوا ف سباق الفورميلا وكان عشقى انى اخلص الجيش واشتغل معاهم     اصلى طالع زى ابويا هو كان بيعشق سباقات "الفورميلا 1"، وانا ورثت منه حب سيارات السباق افتكر مره وانا عندى ١٠ سنين كنت عاوز اروح معاه هو واخويا الكبير السباق لكنه  رفض لأنى لسه صغير و سابنى فى البيت بس انا اتسحبت وروحت حضرت السباق ومن يومها وصوت المحركات وريحة اشتعال الوقود وصوت احتكاك العجلات على الارض اثار فيا شغف وفضول وإصرار أني (ا...

#حرب_البسوس #الليله١٢٩ احنا اتكلمنا قبل كده عن حروب العرب قبل الاسلام او ما يسمى بايام العرب  حكينا عن قصه حرب الزباء بنت عمرو ف قصة مثل  #بيدى_لا_بيد_عمرو 👇 https://m.facebook.com/story.php?story_fbid=996572157781525&id=100022862494719 وكمان حكينا عن حرب داحس والغبراء https://m.facebook.com/story.php?story_fbid=997151971056877&id=100022862494719 الحكايه النهارده بردو تحس انها حكايه لها ابعاد تانيه غير القصه الظاهره  اللى بتقول بالمجمل  ان فى ولّيه ندابه سخنت ابن اختها واتسببت ف حرب فضلت ٤٠ سنه  لدرجة ان العرب طلعوا على الست دى مثل : ( اشأم من البسوس )    ممكن ف البدايه نحط شوية نقط   ١ - الحرب دى قامت قبل الاسلام بحوالى ١٠٠ سنه  ٢ - الاحداث بتقع فى منطقة الحجاز فى  الجنوب قرب بلاد اليمن ٣ - ابطال الحرب اولاد عمومه هم اصلهم بنى وائل  اه ... بنى وائل  متضحوش وائل اسم عربى قديم  وهو الاصل اللى انقسمت منه بنى بكر  وبنى تغلب  ما وراء الاحداث ( #الاسباب ) يعنى ايه سبب ان ولاد عم ياكلوا ف بعض كده لاء  و ك...

#عصامى_ولاعظامى #الليله٤٧٨ #الحكايه_الاولى٢ زى ما حكيت لكم الليله اللى فاتت حبيت ابلغ  لإنزو فيراري مؤسس الشركه وصاحبها النصايح اللى تخلى عربياته ادائها احلى خصوصاً اننا مصنعين للسيارات زى بعض ...بس معجبتش  ايه اللى حصل ؟ ونكمل الحدوته مع نمبر ون اللى بجد لاء يا ابتسام  متفهمنيش غلط مش انا  انا مش محمد رمضان  قصدى انا مش بقول على نفسى نمبر ون انما اللى شايف نفسه كده هو إنزو فيراري هو اللى فضل يغلط ويقول العربيه زى الفل مفيهاش حاجه والعيب على السواق هو اللى مبيعرفش يشغلها  وقالى مش ناقص الا انى اخد نصايح من واحد جاهل زيك روح خليك ف الجرارات الزراعيه اللى بتفهم فيها  ايش فهمك انت ف عربيات السباق والسيارات الفاخره ...  لاء وراح عامل بايده كده✋ ايه ده هو بيخمس ف وشى ؟😳 روحت انا عامله كده 🤌 وقلت له : انا جاهل ؟؟ طب ليه بتستفذ الوحش اللى جوايا ؟ ليه طيب ؟؟ ماشى يا لانزو  انا هاعرفك بقى مين فينا اللى جاهل   الا و سنه ١٩٦٣ كنت بعرض السياره الرياضيه اللى عليها اسم لامبورجينى اه ما ده اسم جدى الاكبر ولقبى العلامه التجاريه بتاعتى بس لو كنت ق...

#سلقط_لملقط  #الليله١٢٨ اصل المثل ان رجل احتفظ ببلاص عسل عند جاره له معروفه بالامانه  وغاب ولما رجع  وطلب البلاص لقاه فاضى  ولما سأل الست ازاى البلاص فاضى ؟؟؟ الست اتكسفت لانها متعرفش ازاى فضى وهى اصلا ماقربتش ناحيته خالص فرجعت تدور ف المكان اللى كانت حاطه فيه البلاص  تشوفه يمكن سال العسل على الارض فهيكون مدلوق ومغرق الارض  او اتشرخ وكان بينز من مكان الشرخ ... او يمكن مال البلاص واتلق او حد فضا منه شويه ف طبق فهيكون فى علامه على جدران البلاص والعسل اتدلق ف طبق وحلق البلاص فيه علامه  بس لا لقته مال ولا سال وراحت للراجل تعتذر وهي مستغربه وهتتجنن  و هو عمال يسألها  : أما سال قط ؟؟ تقوله لاء أما مال قط ؟؟ تقوله لاء واتحرفت الكلمه لسل..قط ومل..قط او زى ما بنقولها دلوقتى  سلقط وملقط بس اللى متعرفوش الست ان عندها ابن  عنده شهيه كبيره اوى  وضمير صغير اوى  والباشا ده كان بيساهى امه ويسرق من العسل عن طريق انه بيدخل عود غابه( زى بتاعه الجوزه ) ويشفط العسل  كده يعنى عامل لنفسه شاليمون بس چامبو و كبير ويطول لاخر البلاص  ويشفط...